Проектот на Министерството за внатрешни работи (МВР) за забрзување на процесот за вадење нови лични документи, кој го најави министерот Оливер Спасовски, предизвика различни реакции кај граѓаните.
Многумина се радуваат на идејата за формирање пунктови каде што ќе можат да се фотографираат без закажување за пасош, лична карта или за возачка дозвола, додека други сметаат дека сега веќе е предоцна за такво нешто и дека термините сè уште се премногу развлечени.
Еден од незадоволните граѓани е и Сашо, скопјанец кој треба да отпатува на свадба во Литванија во мај идната година.
Тој вели дека терминот што му го закажале во МВР за фотографирање за пасош е 11 јуни, што значи дека нема да може да го добие својот нов пасош на време.
„Не ми се верува што се случува. Јас имам платено авионски билет и резервација за хотел, а не знам дали ќе можам да отпатувам. Термините се премногу развлечени и неодговорни. Треба да чекам цела година за да си извадам пасош. Тоа е неприфатливо”, се жали Сашо.
Тој додава дека единствената опција што преостанува е да уплати за пасош по брза постапка, која чини 6.100 денари, што е за три пати повеќе од редовната цена.
„Не сум во положба да трошам толку пари за нешто што требаше да биде решено одамна. Ова е чисто искористување на граѓаните и нивната потреба за лични документи. Сакам да знам зошто не можат да ги издаваат пасошите поубаво и организирано, како во другите земји”, вели Сашо.
Спротивно од Сашо, друга скопјанка која сака да остане анонимна, изразува задоволство од проектот на МВР и вели дека тоа ќе им го олесни животот на многу луѓе.
„Мислам дека ова е одлична идеја. Јас имам потреба од нов пасош, бидејќи ми истекол стариот, а не можев да закажам термин во МВР поради преголем број на баратели. Сега, со овие пунктови, ќе можам да се фотографирам без да чекам и да го добијам пасошот во рок од 15 дена. Тоа е многу побрзо и полесно од претходната постапка”, вели таа.
Таа додава дека формирањето на пунктови за лични документи значително ќе го намали притисокот на МВР и ќе им овозможи на граѓаните да дојдат до својот нов документ без проблеми.
„Се надевам дека овој проект ќе биде успешен и дека ќе ги задоволи потребите на сите граѓани. Му благодарам на министерот што се обидува да ги реши овие прашања кои нè мачат одамна”, вели таа.
Инаку, министерот за внатрешни работи Оливер Спасовски неодамна во интервју за „360 степени“ на МТВ 1 најави дека се подготвува посебен простор во Скопје каде без закажување граѓаните ќе можат да се фотографираат за лични документи.
„Ние веќе подготвуваме еден посебен простор во градот Скопје со инсталирање на нови работни позиции, нови работни станици на кои што ќе можат граѓаните да извршат дактилоскопирање, сликање, за новите лични документи. Веќе во наредниве денови ќе бидеме подготвени и ќе можеме да отвориме нови позиции на кои што граѓаните ќе можат дури и без најава да дојдат и да ги менуваат своите документи“, рече Спасовски.
