Компанија за хартија од кинеската провинција Гуангдонг ќе ги натера вработените буквално да трчаат по своите бонуси. Претседателот на Guangdong Dongpo Paper, Лин Жијонг, за медиумите изјави дека бонусите на вработените ќе зависат од бројот на километри што ќе ги трчаат секој месец, пренесува Business Insider.
Вработените мора да трчаат 51 километар секој месец доколку сакаат да добиваат годишен бонус во висина од 130 отсто од месечната плата, а работниците ќе добиваат годишен бонус еднаков на нивната месечна плата доколку секој месец трчаат 49 километри.
Најактивните тркачи ќе добијат бесплатен пар патики за трчање доколку по половина година трчаат по 49 километри секој месец. За оние кои ќе истрчаат само 30 километри ќе добијат бонус во висина од 30 отсто од месечната плата.
Целта е работниците да бидат здрави
„Мојот бизнис може да опстане само ако моите вработени се здрави“, рече Лин, кој истакна дека двапати се искачил на Монт Еверест, еднаш во 2022 година и еднаш во 2023 година.
Според локалните медиуми, персоналот на компанијата позитивно го поздравил овој потег. Компанијата за хартија моментално има околу 100 вработени.
„Не само што ќе останеме фит, туку и ќе бидеме платени за тоа. Две птици со еден камен“, вели еден вработен.
Сепак, на популарната кинеска социјална мрежа Веибо, иницијативата беше исмејувана.
„Ќе треба да трчате три километри на ден за да ја постигнете месечната цел од 99 километри. Значи, компанијата сака работниците да бидат спортисти?“, рече едно лице на Веибо.
Некои коментираат дека вработените ризикуваат да се повредат само за да ги добијат своите бонуси.
„Овие барања би се сметале за претерани дури и за учениците од спортските училишта. Ќе ги болат колената. Во зависност од возраста и физичката состојба, може да има и проблеми со работата на срцето“, гласи еден коментар на Веибо.
Други веруваат дека неортодоксните практики на Лин ќе доведат до пропаст за неговата компанија.
„Сите, ве молиме внимавајте на иднината на оваа компанија. Верувам дека ќе пропадне во следните пет години“, напиша друга личност на Веибо.
