Бидете внимателни кога одите на пазарување, бидејќи на пазарите во Скопје се појавија нови видови измами, кои особено ги засегаат потрошувачите кои сакаат да купат домашни органски производи.
Како што дознаваат од Денар, некои пензионери, кои се бават со препродажба на јајца, купуваат јајца од фарми за производство на индустриски јајца, ги валкаат во кал и ги продаваат на пазар за двојно повисока цена, претставувајќи ги за органски и домашни јајца.
„Многу пензионери доаѓаат и купуваат само бели јајца за да наликуваат на домашните. Тие ги носат во некои вреќи или кофи и ги валкаат во кал, за да изгледаат како домашни. Потоа ги продаваат на пазар за 30 денари по јајце, додека ние им ги продаваме за 8-10 денари. Тие ги лажат купувачите дека станува збор за домашно органско јајце, коешто е подобро за здравјето и вкусот”, вели за Денар вработен на фарма за индустриски јајца, кој од разбирливи причини сакаше да остане анонимен.
Овој вид на измама не е само нечесен, туку и опасен за здравјето на потрошувачите.
Потрошувачките организации и инспекциите апелираат на граѓаните да бидат внимателни при купувањето домашни производи на пазар и секогаш да го проверуваат нивното потекло и квалитет.
Тие исто така бараат од надлежните органи да ги спречат и казнат овие видови измами, кои го загрозуваат здравјето и довербата на потрошувачите.
Една од жртвите на оваа измама е Виолета Младеновска, скопјанка која барала да купи домашни органски јајца за нејзиното 7-месечно дете.
Таа вели дека откако купила од пазар сфатила дека е измамена.
„Јајцата изгледаа како домашни, со бела кора и малку кал. Јас мислев дека се од слободно одгледани кокошки, кои се хранат со природна храна. Така ми тврдеше продавачот. Но кога ги скршив, жолчките беа бледи и воопшто не наликуваа на домашни. Многу сум разочарана и лута, бидејќи моето дете за првпат пробува јајце и сакав тоа да биде квалитетно”, вели Младеновска.
Таа додава дека не знае како да ги препознае вистинските домашни јајца и дека сега ќе биде многу повнимателна при купувањето.
