Финска е најсреќната земја во светот, а во една финска компанија среќата на работниците се сведува на една голема придобивка, а тоа е флексибилноста.
Станува збор за фирмата „Framery“, која произведува звучна изолација за канцелариски простори. Секоја година, компанијата ги анкетира своите околу 400 вработени за најважните работи што ги прават среќни и ангажирани на работа.
Концептот на рамнотежа помеѓу работата и приватниот живот е секогаш број еден или број два, рече Ани Халила, раководителка за луѓе и култура во Framery.
А со цел да се обезбеди тој баланс, таа рече дека лидерите на компаниите активно ја поддржуваат флексибилноста во работниот распоред и паузите на нивните вработени.
Сосема е нормално дека можете да го „измешате личниот и професионалниот живот“ и така да си го организирате работниот ден или работната недела, пишува CNBC Make It.
„Ако треба да ги носите вашите деца на дневен престој наутро, можете да го започнете денот порано или можете да дојдете подоцна ако треба да одите дома да ги земете среде денот“, објасни Ени.
Нема работно време
Канцеларијата на „Framery“ нема конкретно работно време, додаде таа, но луѓето главно доаѓаат од 7 до 9 часот наутро и заминуваат до доцна попладне.
„Нормално е да се тргне од работа во 4 часот“, рече таа.
Според законот, стандардната работна недела во Финска е 37,5 часа, но лидерите во Framery им дозволуваат на вработените да одлучат со своите менаџери како да ја распределат таа саатница во текот на секој ден.
Во ретки случаи кога нечиј распоред негативно влијае на работата на неговиот тим, се води дискусија со менаџерот за да се направат прилагодувања.
„Можете да работите шест часа денес, осум часа утре и тоа е сосема во ред. Им даваме голема слобода на луѓето да ги балансираат вкупните работни часови. Веруваме дека ќе ја завршат работата. Ова е најважно. Не се работи за часовите - се работи за резултатите“, објасни Халила.
Лидерите исто така поддржуваат редовни паузи во текот на денот. На пример, Халила тврди дека вработените се охрабруваат да прават едночасовна пауза еднаш неделно за да вежбаат, без разлика дали се работи за одење на прошетка или користење на теретана на лице место.
„Ако некој излезе на прошетка во текот на работниот ден, не мислиме „ох, тој опушта или е мрзлив“. Тие се грижат за нивниот фокус и се стремат да го балансираат своето ментално здравје“, заклучи таа.
