Париз подготви речиси 280.000 соби за време на Олимписките игри, но многу од нив нема да пречекаат гости. Првата причина беа астрономските цени кои хотелиерите во меѓувреме ги намалија, но очигледно недоволно. За споредба, за време на Олимпијадата во Лондон, капацитетите беа исполнети до 90 отсто, што барем во моментов е незамисливо во Париз. Од посетата не се задоволни ниту рестораните.
Маршрутата која беше резервирана за парадата на спортистите е повторно проодна за сите чамци. Мостовите се отворени, бреговите на Сена се преполни, но не и рестораните кои беа оградени поради свеченото отворање на Олимписките игри.
- И денеска не отвораме. Тешко е, бидејќи цела недела бевме затворени поради безбедносни мерки, трпиме големи загуби, но разбираме, почетокот на Олимписките игри беше историски момент - вели Зои, менаџер на ресторан на Сена.
Тој момент во живо го следеа бројни гости на француската престолнина.
За време на најголемиот спортски спектакл на планетата, Париз очекуваше 15 милиони туристи. Оправдано за град кој важи за туристичка дестинација број еден во светот. Сепак, првите денови од Олимписките игри покажуваат дека оваа цел е недостижна.
Рестораторите си ги задржаа цените, велат оние со кои разговарал новинарот на РТС. Градскиот превоз е двојно поскап, а цените на сместувањето достигнаа рекорд.
- Лани резервирав стан за 100 евра дневно, многу убав стан со паркинг, сега тоа не е можно - вели еден турист.
Оние кои резервирале порано велат дека имале среќа, бидејќи платиле редовната цена.
Една Американка од Чикаго вели дека веќе е навикната на високи цени и трошоци.
А хотелиерите се навикнати да немаат празни кревети во текот на летото. Ова лето ги разочара. Хотелот во центарот на Париз со поглед на Триумфалната капија не памети лоша сезона, каде цените за ноќевање се од 300 до 600 евра. Сопствениците велат дека не достигнале ниту половина од минатогодишниот приход.
- Пред Олимписките игри се случија неколку работи. Како прво, имаше избори поради кои луѓето мислеа дека ќе има протести во Париз, па се плашеа да дојдат. Друга причина е што најголемите знаменитости беа отсечени поради подготовки. Ова е дефинитивно најтешката сезона, не сметајќи го Ковид - вели Силви, сопственик на хотел во Париз.
Френк Делво, претседател на Синдикатот на хотелиерската индустрија, наведува дека цените тројно се зголемуваат во секој олимписки град, но дека во Париз се под тоа ниво.
- Гледаме дека многу гости ги откажуваат собите, обидувајќи се да поевтинат - рече Делво.
И додека Париз полека се опоравува од свеченото отворање, се чини дека на рестораните и хотелиерите ќе им треба многу повеќе време.
