Долгогодишниот претседател на Југославија, Јосип Броз Тито, за време на своето владеење бил угледен гостин во различни земји, а често добивал и бројни подароци.
Денес, истите овие подароци се зачувани во Музејот на Југославија во Белград, каде посетителите можат да ѕирнат во богатата колекција која вклучува сè, од егзотични уметнички дела до скапоцени рачно изработени предмети.
Но, меѓу бројните подароци, особено се издвојува еден подарок – четири мали камчиња од Месечината, донесени од астронаутите Нил Армстронг и Баз Олдрин.
Овие камчиња, кои дојдоа во рацете на Јосип Броз Тито, денес се дел од музејската колекција во Белград и претставуваат исклучително вреден дел од историјата, пишува Вечерњи лист.
Според историчарката Невена Ковачевиќ, која ја сподели оваа приказна на нејзината страница на Инстаграм, овие камења имаат проценета вредност од неверојатни 500.000 долари, како што утврдила НАСА.
Каменчињата ѝ биле подарени на Југославија во 1970 година како посебен подарок од тогашниот претседател на САД, Ричард Никсон.
„Пред да пристигнат каменчињата во Југославија, ја посетија астронаутите кои беа на Месечината, што беше голема чест. Тројцата астронаути го добија Орденот Југословенска ѕвезда со лента од Тито, а потоа се прошетаа на отворено со автомобил низ центарот на Белград. По тој повод во Белград имаше голема прослава и многу луѓе излегоа на улиците да видат како се случува ова. Никсон испрати каменчиња во Југославија следната година. Освен каменчиња со огромна вредност, астронаутите го донесоа и знамето FNRJ кое патуваше со нив на Месечината и назад. Фактот што Никсон им подари камења од Месечината на жителите на Југославија, а тројцата астронаути ја посетија Југославија, единствената комунистичка земја на нивната рута, зборува за уникатната положба што Југославија ја имаше за време на Студената војна“, рече Невена Ковачевиќ.
