Најжешкото лето во историјата е зад нас според податоците на Европската служба за климатски промени Коперник. Но, дали зимата ќе биде таква?
Српскиот метеоролог Иван Ристиќ за НИН вели дека кон крајот на следната недела може да се очекува студено време кое може да влијае на температурите во зимскиот период. Но, што значи тоа – дали зимата ќе биде типично потопла или дали е можно да се очекува вистинска студена сезона, каква долго време не сме имале?
„Кон крајот на наредната недела ќе има прва посилна пенетрација на постуден воздух од Западна Европа. Тоа е инаку воздух кој ќе дојде од Северниот Пол со поларен вител и ќе има позначителен пад на температура, па максималната температура за следниот викенд ќе биде под 20 степени. Мора полека да ја подготвуваме есенската гардероба. Потоа следува стабилизирање на времето и повторно пораст на температурите. Тоа е крајот на септември, а потоа во октомври обично започнува михолското лето“, вели Ристиќ.
Температурите кои се карактеристични за михолското лето (или мартијанско лето, според светците што ги слават католиците во тој период Св. Михаил и Св. Мартин), се меѓу 22 и 27 Целзиусови степени, а често надминуваат и 30 степени, објаснува Ристиќ. Тој додава дека до октомври нема да имаме точни информации каква зима не очекува, но постојат предвидувања.
„Што се однесува до зимата, ќе имаме информации во октомври, кога ќе биде михолското лето, тогаш ќе можеме повеќе да разговараме на таа тема. Засега ова се предвидувањата на метеоролошките модели, дека ова повторно ќе биде потопла зима со малку снег. Постојат истражувања на кои работи научникот Александар Баљаревиќ, кој е географ и според неговиот модел, се очекува да биде постудена, со снежни врнежи. Но, тоа ќе го знаеме дури во октомври“, вели Ристиќ.
Глобалното затоплување доведе до фактот дека, од година во година, летата стануваат подолги и пожешки, особено на Балканот. Ристиќ посочува дека може да се забележи тренд кој, „не е толку добар“ и дека во последните 14 до 15 месеци бележиме рекордно високи температури на целиот Балкан.
„Доколку продолжи овој тренд на вакви топли месеци, кој трае последните 15 месеци, може да се очекува дека и оваа зима ќе биде рекордно топла. Меѓутоа, сега со ова заладување во септември не е невозможно сепак да има некои промени во циркулацијата на планетата Земја и оваа зима да биде малку постудена“, вели метеорологот.
