Овој заклучок донесен од Владата ги „збуни“ универзитетите, односно дел од нив го сфатија само како препорака, додека други го разбрале како обврзувачки. Ова, пак, поттикна реакција од страна на студентите, кои се најдоа затекнати што среде академска година ќе треба да се вратат на настава на факултет.
Студентите од внатрешноста не можат да најдат сместување среде година
Дел од студентите се израдуваа на враќањето на факултет и дружењето со своите колеги, но за повеќето студенти проблемот со враќање на настава со физичко присуство е во тоа што оние кои студираат надвор од местото на живеење и изминативе две години следеле онлајн настава од дома, сега немаат сместување во градовите каде се наоѓаат нивните факултети, па оттука ваквата препорака ги изненадила.
И додека некои факултети, ги известија студентите дека нема да го менуваат моделот на настава, дел од универзитетите препораката на Владата ја разбрале како „одлука“, па и покрај својата автономија, побрзале да ги известат студентите дека наставата ќе продолжи со физичко присуство.
Факултетите на УКИМ нема да го менуваат моделот, УКЛО продолжува со настава со физичко присуство
Се обративме и до дел од државните и приватните универзитети со прашање дали ќе го менуваат моделот на настава во последните два месеца од тековната академска година. Речиси сите универзитети изминативе две години спроведуваа комбиниран наставен процес – со физичко присуство и на далечина, во зависност од спецификите на студиските програми, бројот на студенти и просторните можности на факултетите.
Од најголемиот универзитет во земјава, УКИМ, велат дека ги разгледуваат новите владини препораки и очекуваат мислење од управата на универзитетот, но главен проблем при враќање на настава со присуство е одржувањето дистанца кај групите со повеќе студенти.
Дел од факултетите на УКИМ, меѓу кои и Факултетот за информатички науки и компјутерско инженерство (ФИНКИ) и Медицинскиот факултет, веќе одлучиле да не го менуваат досегашниот модел на настава, барем до крајот на тековната академска година.
Промена во начинот на изведување на наставата нема да има ниту на Факултетот за електротехника и информациски технологии (ФЕИТ), Економскиот, Правниот, Филозофскиот и Машинскиот факултет.
Подготовки за враќање на настава во предавалните и амфитеатрите се прават и на Универзитетот „Гоце Делчев“ (УГД) во Штип, од каде велат дека ги следат препораките на Владата и ресорното министерство.
Од Американскиот универзитет на Европа – ФОН, известија дека до крајот на оваа академска година ќе продолжи хибридниот модел на изведување на настава.
Онлајн наставата ќе биде опција и понатаму
И покрај препораката за враќање на настава со физичко присуство, моделот на далечинско учење и понатаму ќе биде „составен дел“ од наставниот процес на повеќето универзитети. Преминувањето кон онлајн настава изминатиов период ги покажало придобивките и од овој вид учење.
извор: meta.mk
