Текстилниот сектор со години се соочува со недостиг на работна сила. Оваа трудоинтензивна дејност не е привлечна за младите. Стопанствениците се надеваат дека дуалното образование ќе ја промени состојбата. Анализата се однесува на Источниот регион
Недостигот на работна сила во текстилниот сектор е долгогодишен проблем. Во моментот текстилните компании имаат многу работа, но немаат работници, а оние кои работат во голем дел се блиску до пензија. Стопанствениците проблемот го лоцираат во образованието кое продуцира кадри несоодветни на пазарот на трудот.
Средното текстилно училиште „Димитар Мирасчиев“ во Штип со децении беше расадник на текстилниот кадар, но со години наназад едвај оформува по две паралелки. Годинава има нова насока и платена пракса.
Во источниот регион освен во Штип, текстилни насоки има во средните училишта во Виница и Делчево, каде компаниите ги стипендираат учениците. Но и покрај тоа интерес за овие насоки нема. Заради недостиг на стручен кадар обуки се вршат во фабриките и во Центрите за вработување во рамки на активните мерки за преквалификација.
ЗА МРТ Славица Величковска
