Извршниот директор на „Дизни“, Боб Ајгер, во понеделникот рече дека неговата компанија ќе започне со отпуштање на персоналот почнувајќи од оваа недела, прва од трите рунди очекувани намалувања по неговата најава во февруари дека компанијата ќе укине 7.000 работни места.
Кратењата на глобалната работна сила на „Дизни“ се дел од иницијативата за намалување на трошоците од повеќе милијарди долари, чија цел е да се насочат операциите на компанијата во период на превирања во медиумската индустрија.
Во меморандум до персоналот кој го имаше на увид и Си-Ен-Ен, Ајгер вели дека отпуштањата ќе дојдат во три бранови. Првиот круг ќе започне оваа недела, а менаџерите наскоро ќе почнат да ги известуваат засегнатите вработени. Вториот, поголем круг на отпуштања ќе се случи во април, рече Ајгер, при што ќе бидат отпуштени неколку илјади вработени. Третиот круг на отпуштања потоа ќе се случи „пред почетокот на летото“ за да се постигне планираната цел на компанијата за елиминирање на 7.000 работни места.
„Тешката реалност на многу колеги и пријатели кои го напуштаат Дизни не е нешто што го сфаќаме лесно“, вели Ајгер во белешката. „Во тешки моменти, секогаш мораме да го правиме она што е потребно за да се осигураме дека ‘Дизни’ може да продолжи да испорачува исклучителна забава на публиката и гостите ширум светот – сега и долго во иднината“.
„Дизни“ имаше околу 220.000 вработени од 1 октомври, од кои приближно 166.000 беа вработени во Соединетите Држави. Намалувањето на 7.000 работни места претставува околу 3 отсто од нејзината светска работна сила.
Отпуштањата следуваат по враќањето на Ајгер во „Дизни“ во ноември, откако управниот одбор на компанијата го отпушти Боб Чапек како нејзин лидер.
Извор: biznisinfo.mk
