Четири автобуси треба да пристигнат во Штип до 15 август со што од 1 септември се очекува да почне да функционира градскиот јавен превоз. Постапката е завршена за набавка на еден дел од потребните возила, а се очекува нејзино компетирање со набаква на уште два минибуси. Средствата за возилата се обезбедени од Буџетот на Општина Штип и ЈП „Стипион“.
„Завршена е постапката за еден дел од потребните возила, ќе добиеме возила со капацитет до 40, до 60 и две возила до 100 седишта. Набавката е вредна 58 милиони денари без ДДВ. Во очекување сме на комплетирање на тендерската постапка со набавка на минибуси до 17 седишта. Испораката на возила треба да е до 15 август. Во тек сме со преговори со Општина Карбинци за меѓуопштинска соработка “, вели Стефановски.
Со воведување на градски превоз во Штип се јавува и потребата за нови вработувања. Директорот Стефановски потенцираше дека ќе се отворат нови работни места, а финансиски Претпријатието може да го издржи ова.
„Во финална фаза е новата систематизација, со која се предвидени нови работни позиции, возачи, контролори и слично. Па предвидени се 12 возачи и дополнително уште неколку работни места“, додава Стефановски.
Автобусите ќе се движат на неколку локации и ќе бидат поделени во три категории. Првата е градска и билетот ќе чини 25 денари, втората линија е до населбите Македонка и Балканска и ќе се наплаќа 30 денари, и третата е до Три Чешми, Караорман и Чардаклија и билетот ќе чини 40 денари.
