Револуционерниот европски сателит за далечинско набљудување ERS-2, лансиран во 1995 година, треба да падне на Земјата вечерва. Европската вселенска агенција (ESA) тврди дека поголемиот дел од овој сателит ќе изгори на патот кон Земјата.
Сепак, можно е некои делови да ја издржат топлината што ќе се создаде при спуштањето со голема брзина, иако шансите овие фрагменти да паднат на населени места и да предизвикаат штета се мали. Делови од сателитот би можеле да паднат речиси каде било во светот, а најверојатно ќе паднат во морето, јавува Би-би-си.
ЕСА ја објави својата најнова прогноза во понеделникот, предвидувајќи дека сателитот повторно ќе влезе во атмосферата во среда во 11:14 часот по ET, или 15:19 часот по Гринич, што е 16:19 часот по наше време, со можно отстапување од 19 часот поради непредвидливата сончева активност.
Сателитските фотографии, направени меѓу 14 јануари и 3 февруари, покажуваат дека ERS-2 бил на надморска височина од повеќе од 300 километри. Моментално е на надморска височина од околу 200 километри и паѓа со брзина од над 10 километри дневно, со брзо забрзување. Се очекува да почне да се распаѓа кога ќе достигне надморска височина од 80 километри, а потоа поголемиот дел од него ќе изгори при повторното влегување во атмосферата. Иако постои можност некои фрагменти да стигнат до површината на Земјата, тие најверојатно ќе паднат во океанот.
ЕСА тврди дека ризиците поврзани со несреќата се „многу ниски“ и дека фрагментите не се ниту токсични ниту радиоактивни.
ERS-2 беше лансиран на 21 април 1995 година, а неговата мисија заврши во 2011 година. По 16 години работа, ЕСА одлучи да го извади од орбитата за да ги намали шансите да се судри со други објекти во вселената.
