Кинеските туристи ги надоместуваат пропуштените празници во изминатите неколку години околу коронавирусот, фрлајќи ја готовината на патувањата дома и во странство. Така, трошењето е на пат да ги надмине нивоата пред пандемијата за прв пат – важен показател за закрепнувањето на индустријата.
Кинеските туристи ќе потрошат 1,8 трилиони јуани (250 милијарди долари) оваа година за меѓународни патувања – околу 10 проценти повеќе отколку во 2019-та година, според податоците од Меѓународниот совет за патувања и туризам, индустриска група која спроведува истражувања за патувања. Кинеските туристи кои се впуштаат во авантури поблиску до дома се очекува да донесат рекордни 6,79 трилиони јуани (над 937 милијарди долари) во економијата на копното во оваа година, што исто така ќе го надмине нивото пред пандемијата, според извештајот на Советот, заеднички подготвен со „Oxford Economics“.
„Туристичкиот сектор покажа знаци на издржливост и силно закрепнување“, коментира претседателката на советот Џулија Симпсон.
Кинеските патници се движечка сила за глобалната туристичка индустрија, при што многу земји со нетрпение го чекаат нивното враќање. Кинезите се побројни од туристите од сите други земји, вклучувајќи ги и Американците. Во 2019-та година, кинеските патници направија 170 милиони патувања во странство и потрошија речиси 1,7 трилиони јуани – сочинуваат 14% од глобалните трошоци за туризам, според податоците на Меѓународниот совет за патувања и туризам.
И покрај тоа што меѓународните патувања целосно се опоравија, заостанатите процеси на визи во земји како што се САД и поскапите меѓународни летови ги задржаа кинеските туристи поблиску до дома, собирајќи се во градовите на копното во потрага по популарни локални деликатеси и зачинета улична храна, како и во помалите градовите, развивајќи го трендот на таканареченото „повратно патување“, т.е. за да се избегне гужвата.
Трошењето на домашните патници се очекува да биде за 11% поголемо отколку во 2019-та година – пред пандемијата со Ковид-19 да ги запре повеќето патувања, соопшти Советот.
Во исто време, сепак, бројот на странци кои ја посетуваат Кина сè уште не е закрепнат. Трошењето на странските туристи на копното оваа година се очекува да достигне 715 милијарди јуани, што е околу една четвртина помалку од нивото во 2019-та година, Кина беше една од последните големи економии што повторно ги отвори своите граници, а влезните летови кон земјата не се целосно закрепнати.
Во последниве месеци, Кина ги олесни визните ограничувања за посетителите од Тајланд, Малезија и Сингапур, заедно со некои европски земји и патници со крстарења, во обид да го поттикне влезниот туризам и инвестициите. На почетокот на годината, властите во Пекинг соопштија дека ги олесниле визните барања за 11 земји од јули 2023-та година.
Кина објави 82 милиони туристички посети минатата година – околу 56% од нивото во 2019-та година, според Националното биро за статистика на земјата. Бројот на посети направени од луѓе надвор од Хонг Конг и Макао беше само 13,8 милиони, што заостануваат на бројките пред Ковид за околу 57%.
