Овој уред порано беше единствениот начин да се открие што навистина се случува во пилотската кабина. Сега, по примерот на авионите, се планира да се постават „црни кутии“ во сите понови возила на територијата на Европската Унија, почнувајќи од 7 јули тековната година.
Како функционира „црната кутија“ во автомобилите
„Црна кутија“, односно „Снимач на податоци за настани“ (EDR) е електронски уред кој е поврзан со возилото со голем број сензорски единици, благодарение на што сите податоци за возилото, стилот на возење, се евидентираат.
Сензорите се исклучително чувствителни и можат да „предвидат“ сообраќајна несреќа и да сигнализираат претстоен судир со друго возило или пречка на патот. Снимките кои овој уред ги регистрира се многу кратки: 5 секунди пред и 300 милисекунди по несреќата, пренесува британскиот портал Motor1. Затоа, тие можат да бидат клучен доказ во случај на несреќа на патот.
Врз основа на Регулативата на Европскиот парламент и Советот, EDR уредот ќе биде инсталиран во сите нови патнички и лесни комерцијални возила (до 3,5 тони), почнувајќи од 7 јули 2024 година. Според мислењето на експертите за безбедност во сообраќајот, оваа мерка може значително да придонесе за намалување на бројот на сообраќајни незгоди на патиштата. Зачуваните податоци ќе бидат достапни за сопственикот на возилото, а пристап до нив ќе биде овозможен само по наредба на судија или обвинител доколку се случи несреќа.
„Црната кутија“ ќе биде дел од основната опрема на новите возила, а она што е особено интересно е што нема да има начин да се деактивира, бидејќи ќе се состои од цел електронски систем кој ќе биде вмрежен со остатокот од возилото. Најголемиот недостаток на овој уред е што практично ќе биде невозможно да се вгради кај постарите автомобили, што значи дека дел од возилата на патиштата и понатаму ќе бидат без оваа форма на следење.
