Скопјани се соочуваат со ново поскапување на поголемиот дел од приватните домови за стари лица, што предизвика бран на незадоволство меѓу граѓаните чии роднини се сместени во такви установи.
Милена, чија мајка живее во еден од овие домови, изрази сериозна загриженост за финансиската одржливост на ваквите услуги.
„Секој месец плаќав 600 евра за сместувањето на мајка ми, но сега, со новото зголемување од 100 евра, се прашувам дали ќе можеме да продолжиме со ова. Што мислите, колкава е мојата плата? Па јас работам цел месец само за да ги платам сметките во домот за стари лица. Живееме, односно преживуваме само со платата од сопругот“, изјави таа.
Оваа ситуација не е изолиран случај, туку е дел од поголем тренд на зголемување на трошоците за живот, што ги става семејствата пред тешки одлуки.
Слични чувства сподели и Јасмина С., која вели дека цената за сместувањето на нејзината тетка во приватен дом е зголемена за 100 евра.
„Не е во прашање луксузот, туку неопходноста. Сместувањето во дом за стари лица треба да биде достапно и одржливо за сите, а не само за оние со длабоки џебови”, изјави Јасмина.
Со овие нови цени, многу семејства се соочуваат со тешката реалност дека можеби нема да можат да си дозволат да продолжат со плаќањето на услугите што им се потребни на нивните најмили.
Оваа ситуација го отвора прашањето за регулативата и контролата на цените во приватните домови за стари лица, како и за потребата од подобра поддршка за семејствата кои се соочуваат со овие предизвици.
Додека властите сè уште не даваат конкретен одговор на оваа проблематика, граѓаните бараат итни мерки за заштита на најранливите категории во општеството.
Во време кога економската нестабилност се чини дека е единствената константа, потребата од сигурност и стабилност во секој аспект на животот станува сè поголема.
