На македонскиот поштенски пазар првпат се воведуваат пакетомати – уреди што овозможуваат корисниците самостојно да ја преземат својата пратка во кое било време, во рок од 72 часа. Во Скопје се поставени на седум локации, а во Битола на една.
Според Биљана Глумац од „Карго Експрес“, компанијата која прва ја воведува оваа иновација кај нас, пакетоматите нудат практично и брзо решение за достава. Корисниците можат да ја изберат локацијата што најмногу им одговара, да извршат уплата преку електронско банкарство (ако е потребно) и да ја подигнат пратката преку СМС порака. Со поврзување на линкот од пораката и користење Bluetooth, сандачето автоматски се отвора.
Оваа услуга е дел од поширока стратегија за модернизација на логистичките процеси и одговарање на растечкиот тренд на е-продажба. Како што истакнува Глумац, пакетоматите се еколошки, бидејќи користат соларна енергија, со што се намалува потребата од возила за достава и придонесува за заштита на животната средина.
Во моментот, пакетомати се поставени пред продавници на „Тинекс“, а планирано е да се додадат уште четири во Скопје и да се прошири мрежата низ целата држава.
Глумац нагласува дека е-продажбата сè повеќе станува доминантен начин на купување, што придонесува за развојот на курирските услуги и зголемена конкуренција на пазарот. Сепак, таа предупредува на нелојална конкуренција, како што се компании без лиценци и неопходна инфраструктура, кои ја нарушуваат етиката на поштенскиот пазар.
Во иднина, „Карго Експрес“ планира да воведе автоматизиран систем за сортирање и електрични возила за последната милја на доставата, со цел дополнително унапредување на услугите и исполнување на очекувањата на корисниците.
Извор: biznisvesti.mk
