„ChatGPT“ сега може да извршува задачи во некое идно време зададени од корисниците, соопштија од „OpenAI“, јавува Индипендент.
Новата функција за задачи ќе им овозможи на корисниците да бараат од чет-ботот да закаже било што, од еднократни потсетници до повторливи дејства, како што се неделни брифинзи за вести или дневно известувања за временската состојба.
Од „OpenAI“ велат дека ваквиот потег е важен чекор во правењето на чет-ботот повеќе од корисен придружник кој може да преземе задачи во име на корисникот.
Новата функција е во фаза на тестирање, а во наредните денови ќе биде достапна за претплатниците на „плус“ „тим“ и „про“ пакетите.
Шефот на „OpenAI“, Сем Алтман, неодамна рече дека компанијата е „уверена“ оти сега знае како да изгради таканаречена вештачка општа интелигенција (АГИ) – што многумина го гледаат како следен чекор во еволуцијата на вештачката интелигенција, каде што технологијата може да ги надмине перформансите на луѓето автономно во повеќето работи.
Тој во блог пост претходно овој месец напиша дека очекува агентите за вештачка интелигенција – автоматизирани алатки за вештачка интелигенција кои можат да извршуваат специфични задачи, да „се приклучат на работната сила“ во текот на годинава.
Критичарите на вештачката интелигенција изразија загриженост за потенцијалното влијание на технологијата на пазарот на труд и можноста таа да ги замени луѓето, нешто што многумина во индустријата тврдат дека не е целта на вештачката интелигенција или технолошките фирми, кои велат дека имаат за цел да им помогнат на работниците, а не да ги заменат.
Извор: radiomof.mk
