Пред речиси 20 години, Сомае Мецгер одлучила да ја напушти својата работа во германскиот дом за стари лица и да оди да работи во соседен Луксембург. Луксембуршки научила на курс организиран од нејзиниот работодавец
Од нејзиниот дом во Трир, Германија, каде што живеела со семејството, до работното место, за кое ѝ биле потребни едвај дваесет минути, има околу 13 километри.
„Ниту еден момент не се покајав за мојата одлука“, вели Мецгер.
Таа во никој случај не е единствената која ја напуштила Германија за да работи во Луксембург. Според тамошниот Национален институт за статистика, повеќе од 52.000 Германци работат во оваа мала земја – 30 отсто повеќе од пред 10 години. Огромното мнозинство од нив сè уште живеат во Германија и одат на работа. Само во секторот за здравство и социјална заштита се регистрирани 6.300 Германци, меѓу кои најмалку 4.000 негуватели како Мецгер, пишува „Дојче веле“.
Плата и услови за работа
Тоа може да се види и на нејзиното работно место: повеќе од 80 отсто од 147-те вработени во старечкиот дом „Оп Ламп“ се Германци, кои се грижат за 81 станар во домот.
„Ние конкретно не бараме негуватели од Германија“, вели директорката Миреј Вирц-Ленерц. Меѓутоа, во пограничниот регион се прочуло дека условите за работа во Луксембург се многу подобри отколку во Германија. Прекувремена работа речиси и да нема, повеќе кадрови се одговорни, вработените се почитуваат, а платата е речиси двојно поголема.“
„Заработувам повеќе во Луксембург со 60 отсто од моето време отколку во Германија ако работам со полно работно време“, вели Мецгер.
Големото Војводство Луксембург, со своите 670.000 жители, неодамна повторно ги зголеми платите на вработените кои се грижат за старите и болните. Со 10 годишно работно искуство, негувателка во старечки дом заработува околу 65.000 евра годишно – плус бонуси, додека медицинска сестра може да заработи околу 100.000 евра.
Луксембург очигледно е подготвен да им плати на старателите уште подобро како што старее неговото население. Според проценките на здружението на негуватели Копас, во следните пет години ќе треба да се пополнат 4.000 работни места во секторот за нега, од кои 900 медицински сестри, а тука се и други работници: од физиотерапевти до асистенти во кујна.
Но, во Луксембург, нешто повеќе од 100 негуватели ја завршуваат обуката секоја година. Околу 50 отсто од медицинските сестри веќе доаѓаат од соседните земји. Управничката на домот за стари лица во Луксембург, Вирц-Ленерц, стравува дека во наредните години ќе биде потешко да се добијат негуватели од Германија.
„И таму растат платите“, вели таа, но смета на подобрите работни услови, пониските даноци и на крајот подобри пензии во Луксембург.
Истовремено, тоа е катастрофа за домовите за стари лица и болниците од другата, германска страна на границата. Само од болницата „Barmherzige Bruder“ во Трир, 25 до 30 медицински сестри секоја година одат во Луксембург.
Нема враќање назад
За Мецгер работа во татковината не доаѓа предвид.
„Во Германија бев задолжена за девет или десет стари лица во една смена, често работејќи 15 дена по ред. Во Луксембург имам пет луѓе за кои треба да се грижам.
Таа не верува дека таму нешто ќе се промени. Во Луксембург нејзиниот работодавец ги зема предвид нејзините желби кога го организира распоредот и таа е исклучително задоволна.
„Лесно ги балансирам работата и приватниот живот. Тоа е и превентивна мерка против лошото расположение и стресот“.
А бројот на такви во Германија се зголемува, не само во секторот за нега.
