Кафето полека исчезнува од српските дуќани. Граѓаните забележале дека утрово во некои продавници нема кафе, не можело да се најде кафе од ниту еден производител. Горан Радосављевиќ, професор на факултетот ФЕФА, за Нова.рс вели дека кафето автоматски поскапува штом се зголеми акцизата за него.
Тој забележува дека Србија е една од ретките земји во Европа која има акциза за кафето, бидејќи на Запад, како што наведува, акцизите се почести на производите со додаден шеќер отколку на кафето.
Зголемувањето на акцизите на почетокот на февруари ќе донесе повисоки цени на кафето кај северниот сосед. Цената на кафето во изминатиот период е зголемена поради недостигот на овој производ на светскиот пазар. Економистите проценуваат дека без разлика на поскапувањето во Србија, потрошувачката на овој производ нема да се намали. Владата одлучи да ги зголеми акцизите, односно да ги усогласи со ланската инфлација од 4,5 отсто.
Акцизата на непеченото кафе се искачи на 112,71 динари за килограм од 108,06 динари. Цената на печеното кафе се зголеми од 135,07 на 140,88 динари за килограм. Просечен жител на Србија пие околу четири килограми кафе годишно, односно околу 600 шолји годишно. По новото покачување на акцизата, нема дилема дека кафето и неговите производи ќе поскапат, без разлика дали ги купувате во продавници или ги нарачувате во ресторани.
Фјучерсите за кафе Арабика достигнаа рекордно високо ниво 13-та трговска сесија по ред. Извештаите за систем за суво и топло време што се формира над регионите на кафе во Бразил помогнаа да се зголемат цените, бидејќи земјоделците во најголемиот светски производител не сакаат да продаваат, известува Clix.
Фјучерсите на кафето во Њујорк, кои се сметаат за глобален репер цена, претходно достигнаа рекорд од 4,2410 долари за фунта, затворајќи се за 6,2 отсто на 4,211 долари за фунта.
Цените годинава пораснаа за околу 35 отсто по скокот од 70 отсто минатата година. На пазарот постои загриженост поради малите залихи во Бразил, кој произведува скоро половина од светската Арабика. Тамошните земјоделци продадоа околу 85 отсто од сегашниот род и не брзаат да продадат повеќе.
Извор: faktor.mk
