Скопската Брза помош има потреба од итни вработувања. Само 4 до 5 екипи од лекар, сестра и возач во една смена од 12 часа го покриваат целиот град и околината, а според стандардите за население од речиси еден милион жители треба да има тројно повеќе тимови.
Од службата информираат дека се принудени да прават строга селекција на повиците за да може веднаш да интервенираат и да им помогнат на оние лица кои се во животозагрозувачка состојба. Дека состојбата е алармантна потврди и директорот на Здравствен дом – Скопје.
Покрај лекари, сестри и возачи за Брзата помош, во скопските поликлиники има недостиг и на невролози и дерматолози, односно десетина доктори.
Според министерот за здравство дел од недостигот на специјалисти во јавните здравствени установи ќе се надополни со вработувања на приватните специјализанти кое требаше да се случи пред Нова година, но процесот како што рече Таравари заглавил поради систематизациите кои требало да ги направат болниците и клиниките.
- Од вкупно 108 јавни здравстени установи кои подготвуава нови систематизации, 20 веќе се подготвени и можат веднаш да почнат да ги вработуваат првите 300 специјализанти. Останатите ги чекаат новите систематизации од Министерството за администрација, истакна министерот за здравство.
Во меѓувреме за да се растеретат гужвите во сезоната на вируси и настинки на Детска и Клиниката Козле, дежурен педијатриски пункт е отворен и во поликлиниката Бит Пазар, ќе работи секој ден од 19 до 7.30 наутро, а во неделите цел ден.
