Кога започнувате со првата работа, еден од најголемите предизвици е разговорот за платата.
Многу млади се чувствуваат непријатно да ја отворат оваа тема, плашејќи се дека ќе изгледаат пребирливо или дека ќе ја загубат шансата за вработување.
Постојат стереотипи дека доколку се преговара за плата на почетокот, тоа може да создаде лош впечаток или пак да влијае негативно на шансите за добивање на работата. Но, важно е да се разјасни дека преговарањето за плата не е само дозволено, туку е и клучен дел од процесот на почетокот на кариерата. Преговарањето за плата е знак на самодоверба и свесност за сопствената вредност, како и спремност да се поставите на правото место и да бидете вреднувани според вашите вештини, образование и искуство.
Платата е суштински елемент од вашата професионална патека, а начините на кои се преговара и поставува ова прашање, може да влијаат на вашето идно искуство во работната средина. Затоа е важно да се запознаете со стратегиите и техниките кои ќе ви помогнат да се чувствувате сигурно и да го добиете она што го заслужувате. Разговорот за плата не треба да биде табу, туку треба да се гледа како дел од здравиот процес на комуникација и професионален развој.
Како да пристапите кон преговарање за плата?
1. Истражете ја пазарната вредност
Пред да одите на интервју, направете истражување за просечните плати во индустријата за позицијата што ја барате. Ова ќе ви даде реална претстава за тоа што можете да очекувате и ќе ви помогне да не прифатите значително пониска сума од она што навистина вреди работното место. Како се движат платите за вашата позиција, можете да проверите на MojaPlata.mk, каде што ќе најдете информации за просечните плати во различни индустрии и позиции во Македонија.
2. Кога да зборувате за плата?
Вообичаено, работодавачот ја отвора темата за плата во подоцнежните фази од интервјуто. Ако тоа не се случи, почекајте прав момент и прашајте за понудената сума. Ако ве прашаат за вашите очекувања, споменете опсег што е во согласност со вашето истражување.
3. Не ја прифаќајте веднаш првата понуда
Работодавачите често ја нудат пониската граница на буџетот за одредена позиција, оставајќи простор за преговарање. Наместо веднаш да кажете „да“, побарајте време да размислите и аргументирајте зошто заслужувате повисока плата.
4. Фокусирајте се на вредноста што ја носите
Наместо да зборувате за вашите финансиски потреби, истакнете ги вашите вештини, знаења и мотивација. Објаснете како вашиот ангажман ќе придонесе за успехот на компанијата и зошто вашата плата треба да го одразува тоа.
5. Бидете подготвени за компромис
Ако компанијата има ограничен буџет, размислете за алтернативни бенефиции како бонуси, дополнителни обуки, флексибилно работно време или можност за унапредување во иднина.
Како да научите повеќе за успешното преговарање за плата?
Vrabotuvanje.com.mk ќе биде дел од Саемот за образование, што ќе се одржи на 15 и 16 март во Skopje City Mall, каде ќе имате можност да разговарате со нас за оваа важна тема. Ќе споделиме практични совети за тоа кога и како да преговарате, како да го подготвите вашиот одговор и што да направите ако добиете понуда што не ги исполнува вашите очекувања.
Посетете нè на саемот и дознајте како да ја добиете платата што ја заслужувате!
