Познатиот "fast food" бренд се пофали со својот "AI" тренер.
„Такос со голема порција вештачка интелигенција, ве молам.“
Тоа е она што ланецот "Taco Bell", кој е дел од "Yum Brands", оваа недела „сервираше“ на Волстрит – најновиот обид на големите синџири за брза храна да промовираат нова технологија што штеди работна сила.
Извршните директори на компанијата ги претставија своите алатки базирани на вештачка интелигенција за менаџерите на ресторани, откривајќи во вторникот на настан за инвеститори во Бруклин дека инвестирале една милијарда долари во дигитална технологија.
За да прикаже како ќе се користи "AI" технологијата, главниот оперативен директор, Џејсон Кид, им покажа на аналитичарите од Волстрит видео скеч со менаџер на ресторан што разговара со "AI" асистент наречен "AI" тренер.
„Забележав дека Бред не дојде на смена, а ти влегуваш во последната ноќна смена“, вели актерот што го глуми "AI" асистентот, обраќајќи се на менаџерот на "Taco Bell".
„Можеби е болен. Не грижи се ако е така. Можам да ги обработам нарачките за "drive-through" – додава "AI" асистентот.
Околу 500 локации на "Taco Bell" во САД веќе користат "AI" гласовна технологија за примање нарачки преку "drive-through", според податоци што ги објавија раководителите на компанијата по прикажувањето на скечот. Тоа претставува значителен раст, бидејќи во јули минатата година "AI" беше воведена на само 100 локации.
Од компанијата истакнуваат дека "AI" не се воведува за да ги намали трошоците за работна сила, туку за да им овозможи на вработените да се фокусираат на други задачи.
Трансформација на индустријата за брза храна
"Fast food" компаниите го менуваат својот бизнис модел стар повеќе од 80 години. Во последната деценија, расте употребата на самопослужни киосци, дигитални менија, апликации засновани на вештачка интелигенција и програми за лојалност.
„Речиси 25.000 од вкупно 61.000 ресторани низ светот користат некој вид на AI технологија“,изјавија од "Taco Bell" минатиот месец.
Во видеото, "AI" тренерот предложи продолжување на работното време на рестораните поради зголемена продажба во доцните часови, а исто така понуди асистенција за пресметување на резервите.
– Одлично, тоа навистина штеди време – одговара менаџерот во скечот.
Претставник на компанијата не одговори веднаш на барањето за коментар дали "AI" веќе работи на овој начин или дали тоа е само визија за иднината.
"Taco Bell" објави дека очекува раст на приходите од 8%, додека некои аналитичари оценуваат дека компанијата во иднина би можела да го продава својот "AI" софтвер и надвор од сопствената мрежа.
Сепак, дел од експертите оценија дека прикажаниот скеч бил благо вознемирувачки, поставувајќи прашања за идната улога на луѓето во индустријата за брза храна.
Извор: tocka.com.mk
