Во Германија се води интензивна дискусија за најавената реформа на законот, која ќе го олесни стекнувањето германски пасош и ќе овозможи двојно државјанство. Како другите земји ги регулираа овие прашања?
Патот до стекнување државјанство е уреден на многу различни начини во Европа. Поради глобалните, сè позачестените и масовни миграции и движења на бегалците, поради зголемувањето на бројот на бинационални бракови и поради се поизразениот недостаток на професионална работна сила - многу европски земји ги реформираа законите за државјанство во последните две децении.
Два пасоша, брзо државјанство, златна виза: според истражувањето на Deutsche Welle, двојното или повеќекратното државјанство е веќе секојдневие во повеќето европски земји. Со планираната реформа на Законот за државјанство, кон овој тренд сака да се приклучи и Германија.
Услови за пасош: од 5 до 10 години
Релативно ниски бариери за државјанство постојат во Франција, Велика Британија, Португалија, Полска, Шведска, Финска и Белгија. Таму имигрантите можат да аплицираат за државјанство откако ќе поминат пет години во земјата и во текот на тие пет години имаат законски регулиран статус - и тоа без прекин. Ако живеат со својот брачен другар, рокот се намалува на само три години. Покрај тоа, по стекнувањето на државјанството од земјата во која што живеат, тие имаат право да го задржат првобитното државјанство, односно земјата од која доаѓаат.
Во земји како што се Швајцарија, Австрија, Италија, Шпанија, Бугарија, Чешка и Словенија, пред да поднесат барање за пасош, имигрантите мора да докажат дека поминале најмалку десет години во таа земја, континуирано и со регулиран правен статус.
А некаде во средина се земји како Ирска, Унгарија, Романија или Словачка, каде што се потребни најмалку осум години, а во Данска - девет години.
Двојно државјанство
Само неколку европски земји избегнуваат, па дури и забрануваат двојно државјанство. Во групата земји кои рестриктивно го регулираат ова прашање, покрај Германија се и Украина, Холандија, Австрија, Естонија, Бугарија, Шпанија, Норвешка, Летонија и Литванија.
Спротивно на тоа, некои земји буквално го претворија стекнувањето дополнително државјанство во бизнис модел. Меѓу другите, Грција, Турција, Португалија и Малта нудат таканаречени златни визи - т.е. право на државјанство на странците кои купуваат недвижен имот, инвестираат капитал или започнуваат бизнис во нивната земја.
Наскоро и во Германија
По усвојувањето на планираната реформа, Германија би била во групата земји каде пречките за стекнување државјанство се релативно ниски. Според Сојузното Министерство за внатрешни работи, новиот Закон за државјанство треба „да овозможи повеќекратно државјанство и да го поедностави процесот на стекнување германско државјанство“.
А тоа би значело дека германските граѓани кои бараат друго државјанство од лични или деловни причини, на пример кога живеат во странство, нема да мора да се откажат од своето германско државјанство.
Во Германија веќе има бројни можности за дополнително државјанство - покрај германското. На граѓаните на ЕУ им е дозволено да го задржат своето прво државјанство. А на многумина кои се стекнале со германско државјанство им е дозволено да ги задржат оригиналните пасоши бидејќи земјата на потекло не ги „отфрла“ од државјанство. Меѓу нив има и бројни бегалци.
Како што соопшти Сојузното Министерство за внатрешни работи, предлог-законот за германско државјанство, предложен од министерката Ненси Фаезер, во моментов е во фаза на внатрешни консултации меѓу владините ресори. Засега не се знае кога конечната верзија ќе биде во собраниска процедура, односно кога пратениците во Бундестагот ќе го изгласаат законот.
