Наместо специјалистите, отсега матичните лекари ќе препишуваат терапија за хронично болните, ќе прават дијагноза и детекција. Ресорниот министер Меџити ја најави првата фаза од реформите во примарниот здравствен систем. Вели, целта е граѓаните услугите да ги добиваат во својот град, а не да патуваат до клиниките во Скопје…
Матичните лекари добиваат поголема одговорност. Наместо специјалистите, отсега тие ќе препишуваат терапија за хронично боните, а и дополнително ќе прават дијагноза и детекција. Ова е првата од низата реформи кои треба да ја трансформираат примарната здравствена заштита. Целта, според министерот Меџити е граѓаните да добиваат услуги во својот град, а не да патуваат на клиника во Скопје. Ова треба да го растовари и „Мој Термин“.
Доктор Злате Мехмедовиќ ќе биде предводник на тимот што ќе ги спроведува реформите. Тој вели дека матичните ќе добијат упатства и протоколи по кои ќе треба да постапуваат при третман, скрининг и лекување на ХОББ, астма, висок крвен притисок, дијабетес, хипотиреоза. Се планира во „Мој Термин“ да има посебен модул што ќе покажува кој пациент со хронично заболување е лошо третиран, а кој е во ризик.
Мехмедовиќ најави дека упатства за работа ќе добијат и педијатрите и гинеколозите. Реформата треба да заврши до 2025-та година, а се спроведува во соработка Светската здравствена организација.
