Во последните години, многу млади луѓе од Македонија откриваат дека шопингот во соседно Косово, особено во главниот град Приштина и растечкиот трговски центар во Феризај, нуди привлечни можности кои не можат да се најдат дома.
Со цени кои се значително пониски и разновидност на брендови, овие два града стануваат популарни дестинации за младите потрошувачи од Македонија во потрага по модни парчиња.
Една 22-годишна студентка од Скопје сподели дека во годината најмалку четири до пет пати патува до Приштина за шопинг.
„Облеката таму не само што е поевтина, туку и изборот е поголем во споредба со моловите во Скопје. Патувањето е исто така еден вид авантура и можност да се избега од секојдневието”, раскажува Теона Василевска од Карпош.
Од друга страна, една 50-годишна жена од Скопје истакна дека Феризај е нејзината омилена дестинација.
„Трговските центри таму нудат квалитетна и оригинална облека по цени кои се непобедливи. Не е само за шопингот, уживам и во ручекот во центарот на Феризај, што го прави мојот ден целосно исполнет”, објаснува нашата соговорничка.
Оваа трендовска шема за шопинг не само што е забавна, туку исто така ја засилува економската врска помеѓу Македонија и Косово, покажувајќи дека модата и трговијата не познаваат граници.
Со зголемената популарност на овие шопинг патувања, се очекува дека и двата града ќе продолжат да привлекуваат посетители кои се во потрага по уникатни модни парчиња и поволни понуди.
Покрај тоа што многумина патуваат со сопствен превоз, сè повеќе граѓани се одлучуваат за организирани тури со автобус, кои ги нудат агенциите.
Повратната карта обично чини околу 350 денари, што е прифатлива цена за ден исполнет со уживање во шопингот и истражување на нови места.
