Европската комисија соопшти дека заедничкото претпријатие за компјутери со високи перформанси, EuroHPC, одобри седум предлози за основање на првите фабрики за вештачка интелигенција низ Европа. Целта на иницијативата EuroHPC AI Factories е создавање на мрежа на центри за вештачка интелигенција, кои ќе обезбедат поддршка за стартапи, мали и средни претпријатија, како и истражувачи, со ресурси за високи компјутерски перформанси, обука и техничка експертиза.
Оваа иницијатива претставува значаен чекор за Европа во градењето на екосистем за обука на напредни AI модели и развој на иновативни решенија.
Во рамките на проектот, планирана е инвестиција од 1,5 милијарди евра, која ќе се финансира од национални и ЕУ фондови, вклучувајќи ги програмите „Дигитална Европа“ и „Хоризонт Европа.“ Фабриките ќе бидат лоцирани во истражувачки и технолошки центри низ Европа, меѓу кои се Барселона (Шпанија), Болоња (Италија), Кајаани (Финска), Бисен (Луксембург), Линкопинг (Шведска), Штутгарт (Германија) и Атина (Грција).
Проектот вклучува 15 земји-членки и две партнери на EuroHPC, со нови суперкомпјутери во Финска, Германија, Италија, Луксембург и Шведска, како и надградба на постоечкиот систем во Шпанија и суперкомпјутерот DAEDALUS во Грција. Некои од фабриките, како оние во Шпанија и Финска, ќе понудат експериментални платформи за развој и тестирање на иновативни AI апликации, промовирајќи соработка низ Европа.
Со овие инвестиции, компјутерските капацитети на EuroHPC ќе бидат повеќекратно зголемени, задоволувајќи специфични потреби и зајакнувајќи ги европските можности во областа на вештачката интелигенција. Се очекува суперкомпјутерите да станат функционални до 2026 година.
Европската комисија најави и можност за дополнителни предлози за нови фабрики до февруари 2025 година, што може да резултира со понатамошно проширување на мрежата за вештачка интелигенција во ЕУ.
Извор: inovativnost.mk
