Растот на цените и поскапувањето на сите производи и услуги е следен и од угостителскиот сектор. Официјалните податоци покажуваат дека за една година угостителските услуги се зголемени за 5,8 отсто. Поскапено е буквално се што се нуди во угостителството, од храна, пијалоци, ноќевања, туристички прошетки.
Податоците кои ги објави Државниот завод за статистика покажува дека најголем раст на цените има кај ноќевањата и тоа, за една година односно во јануари годинава во однос на јануари 2023 година цената на сместувачките капацитети е зголемена за 22,1 отсто.
Податоците велат дека храната која се служи во рестораните е поскапа за близу 2 отсто. Зголемување на цената има кај готвените јадења, печените меса и јадењата по порачка. Но, нови повисоки цени на годишно ниво има и кај варивата, салатите, и десетрите. По поскапи цени во угостителските објекти се продаваат и безалкохолните пијалаци и тоа за три отсто како и алкохолните пијалаци за 4,5 отсто. На месечно ниво растот на цените е помал.
„Според податоците на Државниот завод за статистика, индексот на цените на угостителските услуги во јануари 2025 година, во споредба со декември 2024 година, е зголемен за 0.2 %.
Споредено по групи на услуги, зголемување е забележано во групите Храна за 0.3 %, Безалкохолни пијалаци за 0.1 % и Ноќевања за 0.3 %. Индексот на цените на угостителските услуги во јануари 2025 година, во однос на истиот месец од претходната година, е зголемен за 5.8 %“, се наведува во извештајот на ДЗС.
Сепак, ваквите цени не ги откажуваат граѓаните да бидат редовни посетители во угостителските објекти. Сликата е позната, без разлика дали станува збор за работно време, или по работа, ноќните часови или пак во текот на викендите, угостителските објекти се тие кои имаат најмногу работа.
