Цвеќарниците во Загреб забележале дури 12,3 пати повеќе трансакции во однос на просечен ден, што е најдобар резултат меѓу сите анализирани европски престолнини.
Загреб се покажа како најромантичниот европски главен град, според податоците на Visa, која ги анализираше минатогодишните податоци за купување цвеќе на Денот на вљубените. Тогаш, загрепските цвеќарници забележале дури 12,3 пати повеќе трансакции во однос на просечен ден, што е најдобар резултат меѓу сите анализирани европски престолнини, соопштуваат од компанијата.
Анализата на податоците за дигитални плаќања во цвеќарници, спроведена од Visa на 14 февруари 2024 година, покажала значителни разлики меѓу европските метрополи. По Загреб, на второ место е Братислава со 9,9 пати повеќе трансакции, додека Варшава е на третото место со 8,8 пати повеќе купувања.
Интересно е што традиционално романтични дестинации како Париз и Берлин забележале значително поскромни резултати, се наведува во соопштението. Овие податоци се однесуваат на плаќања со Visa картички и ја споредуваат куповната активност на Денот на вљубените со просечен ден. Според податоците на Visa, француската престолнина имала само 4,6 пати повеќе трансакции од вообичаено, што ја смести на последното, 14-то место меѓу анализираните градови, додека во Берлин бројот на купувања бил пет пати поголем.
„Денот на вљубените не е само посебен повод за паровите, туку и клучен период за малите бизниси, особено за цвеќарниците“, истакна Рената Вујасиновиќ, директорка на Visa во Хрватска, додавајќи дека компанијата е особено посветена на поддршка на малите претприемачи преку овозможување сигурни и беспрекорни плаќања.
Од останатите поголеми европски престолнини, Лондон забележал 8,6 пати повеќе трансакции, додека Рим имал 8,7 пати поголема продажба на цвеќе во однос на просечен ден. Средината на листата ја заземаат градови како Прага со 6,2 и Мадрид со 5,5 пати повеќе трансакции кога станува збор за плаќања со Visa картичка.
Извор: poslovni.hr
