Додека најдолгиот лет во светот трае исцрпувачки 19 часа, помеѓу Њујорк и Сингапур, најкратката авионска рута трае помалку од две минути и се наоѓа во Европа.
Патувањето помеѓу шкотските острови Вестреј и Папа Вестреј во архипелагот Оркни трае околу 90 секунди. Летот покрива само 2,7 километри – отприлика должината на пистата на аеродромот во Единбург – и завршува пред повеќето авиони воопшто да ја достигнат висината за крстосување, што обично трае 10-15 минути.
Линија со важна улога
Оваа рута од 1967 година ја одржува регионалната авиокомпанија Loganair, со летови секојдневно, освен во сабота. Иако летот веќе е екстремно краток, најбрзото забележано време е само 53 секунди. Овој рекорд го поставил пилотот Стјуарт Линклејтер, кој пред своето пензионирање во 2013 година ја прелетал оваа рута повеќе од 12.000 пати.
Линијата има пресудна улога во животот на локалната заедница, поврзувајќи ги северните острови на Оркни со Кирквол, најголемиот град на архипелагот. Мал авион Britten-Norman BN2B-26 со капацитет од 10 патници често превезува полицајци, лекари, наставници и ученици.
Туристичка атракција
Освен што е важна транспортна врска, оваа единствена авионска рута стана и туристичка атракција. Љубители на авијацијата од целиот свет доаѓаат да го искусат најкраткиот лет во светот, што донесе економски придобивки за островите.
Папа Вестреј, познат како Папај, има драматични карпи, песочни плажи и историски локалитети како неолитската фарма Knap of Howar – најстаро зачувано камено живеалиште во Северна Европа. Островот е долг околу 6,4 км и широк 1,6 км, со околу 90 жители.
Вестреј, пак, е многу поголем – зафаќа 72 квадратни километри и има околу 600 жители. Познат е по импресивните карпи, нетакнатите плажи и археолошките наоѓалишта, како замокот Нолтланд од 16 век.
Цена на летот
Иако рутата привлекува туристи, цената на билетот не е превисока – еднонасочен лет чини 17 фунти (околу 20 евра), според веб-страницата на Loganair. Алтернатива е траектот, кој чини само 2,95 фунти (околу 3,50 евра), но трае многу подолго – еден час и 45 минути, а сообраќа само двапати неделно, во вторник и четврток.
Извор: eupravozato.mondo.rs
