Во Германија има делови од автопатот без ограничувања, но тоа автоматски не значи дивеење без никаква контрола. На оваа тема се осврна Институтот за германска економија во Келн (IW), а според нивните податоци, возачите на овие делници возат со просечна брзина од 113,5 km/h.
Како што додава институтот, има голем број на автомобили кои возат околу 130 km/h, најверојатно со помош на темпомат.
За четири месеци минатата година, IW следеше податоци за брзините на автомобилите што минуваат покрај мерните станици. Вкупно имало 1,9 милијарди возила, а 83% од нив се движеле побавно од 130 km/h, додека 10% од нив се движеле помеѓу 130 km/h и 140 km/h.
Забележано е дека околу 1% од автомобилите одат со брзина поголема од 160 km/h, а дури и при идеални услови за возење, брзините главно биле помеѓу 100 km/h и 130 km/h.
Сите податоци покажуваат дека Германците возат малку побавно од претходните години – според слични студии, во 2021 година просечната брзина била 116,5 km/h, а во 2022 година брзината била 115,2 km/h.
