Просечната месечна нето-плата по вработен во правните лица за јануари годинава изнесува 1.392 евра, што е реално за 8 отсто повеќе отколку во јануари 2024 година, објави во четвртокот Централниот завод за статистика (ЦБС).
Просечната месечна нето-плата од 1.392 евра е номинално повисока за 31 евро или 2,3 отсто во однос на декември лани. Во однос на јануари 2024 година, нето платата номинално е повисока за 153 евра или 12,3 отсто, а реално за 8 отсто.
Највисока просечна месечна исплатена нето-плата по вработен е исплатена во секторот авиосообраќај и изнесува 2.184 евра, а најниска во секторот производство на облека 919 евра.
Хрватска е на прво место во ЕУ според растот на платите во последниот квартал од минатата година, според Европскиот завод за статистика.
Според нив, во четвртиот квартал од минатата година, трошоците за работна сила по час пораснале во просек за 4,3 отсто во ЕУ во однос на истиот квартал од претходната година.
„Најголемо зголемување на трошоците за саатни плати за целата економија е забележано во Хрватска (13,9 отсто), Полска (13,8), Романија (13,1) и Бугарија (13)“, објави Евростат.
Најмал пораст на вредноста на еден час работа е забележан во Луксембург, Франција, Белгија, Шпанија, Финска и Шведска. Во сите земји порастот е под просекот на ЕУ кој, повторуваме, изнесуваше 4,3 отсто.
Кога станува збор за зголемувањето на платите во реалната економија, во Хрватска во последниот квартал од минатата година тоа е 12 отсто во однос на истиот квартал од претходната година. Во јавниот сектор (неделовна категорија) зголемувањето е 18,2 отсто, покажуваат европските статистичари.
Извор: pari.com.mk
