Во агендата на овогодинешната меѓународна HR конференција, која беше организирана од Македонската асоцијација за човечки ресурси во хотелот DoubleTree by Hilton во Скопје, беа вклучени низа интересни предавања од докажани експерти од областа на управувањето со човечките ресурси. Помеѓу нив, особено вреди да се издвои презентацијата “Како да создадете ефективен бренд на работодавач“ на Патриша Меглич од Универзитетот во Небраска.
Патриша Меглич е вонреден професор на Универзитетот во Небраска и визитинг професор на Универзитетот во Љубљана. Таа предава повеќе предмети на додипломски и постдипломски студии за управување со човечки ресурси, кадар и развој на таленти. Д-р. Меглич е и коавтор на широко употребуван учебник за управување со човечки ресурси кој моментално е во 16-то издание. Нејзините истражувачки интереси се првенствено во дисфункционалното однесување на работното место, како што е мобинг, навредлив надзор и неправилен третман на нов вработен. Во нејзината кариера учествувала на голем број семинари, програми и обуки, а поседува и SPHR и SHRM-SCP сертификати.
Како да создадете ефективен бренд на работодавач
Своето предавање Д-р. Меглич го започна со дефинирање на поимот employer brand(ing) како репутација на организацијата која има за цел да му каже на “светот“ за што се залага вашата компанија, да ги пренесе вредностите, културата и “вибрациите“ кои владеат во компанијата и да им го даде одговорот на прашањето “зошто“ на вашите тековни и идни вработени.
Зошто брендот на работодавач е толку значаен?
Уште на самиот почеток, таа нагласи дека брендот не е се што создавате или пренесувате, туку само тоа што вработените и кандидатите го мислат за вашата организација. Реалноста е дека вашиот бренд постои, дури и да не сакате да го креирате. Таа истакна дека брендот има голем импакт врз привлекувањето на таленти посочувајќи на еден податок од Corporate Responsibility Magazine дека дури 69 проценти од работобарателите нема да прифатат работа во компанија со лоша репутација.
Потрошувачки бренд vs. бренд на работодавач – во што е разликата?
Д-р. Меглич направи разграничување помеѓу термините потрошувачки бренд (каде целна група се потрошувачите на производот или услугата на компанијата) и бренд на работодавач (каде целна група се вработените и кандидатите) и порача да се заземе холистички/синергичен пристап во градењето на бренд на работодавач позајмувајќи идеи од потрошувачкиот брендинг.
Кои се целите на employer branding-от?
Според Д-р. Меглич, успешните компании се стремат да постигнат три цели преку брендот на работодавач:
- да им се помогне на вработените да ги интернализираат вредностите на компанијата;
- да изградат репутација на работодавач од прв избор; и
- да привлечат и задржат одлични вработени.
Како да го изградите својот бренд?
Најпрво, потребно е да ја разберете организациската култура на вашата компанија која вклучува вредности и мисија/визија, а потоа треба да ја разберете вредноста која можете да им ја понудите на вработените: услови за работа, награди, работно окружување, меѓусебни односи, можност за учење и развој итн.
Како да го комуницирате својот бренд?
Д-р. Меглич спомена дека комуницирањето на брендот на работодавач се одвива во неколку чекори:
- Разбирање на целната група
- Кого сакате да привлечете?
- Кого сакате да задржите?
- Создавање на пораката што сакате да ја пренесете
- Што е тоа што сакате да го пренесете?
- Кој треба да ја создаде пораката?
- Моќта на луѓето
- Вашите вработени се најдобри амбасадори
- Сведоштва / успешни приказни за вашите вработени
- “Еден ден во вашата компанија“
- Внатрешни канали
- Интранет
- Корпоративни настани
- Контакт со менаџерот
- Надворешни канали
- Запознајте ги луѓето таму каде што се
- Социјални мрежи
- Поврзување со студенти
- Страна за кариера
