Општа е оценката на бизмисмените дека досега предложените мерки на македонската Влада за помош на стопанството, на компаниите кои навистина претрпуваат големи штети од епидемијата со коронавирусот, се безмалку безначајни. Ова што досега е предложено е навистина неприфатливо, велат тие.
Дел од бизнисмените кои учествуваат во расправите по стопанските комори велат дека Владата мора да преземе многу порадикални мерки за да не дојдеме во ситуација цела држава да дојде во колапс. Уште сега штетите се бројат со милиони, а давање нови поволни и бескаматни кредити со грејс период или намалување на каматните стапки се навистина трошки во однос на она што досега е веќе регистрирано како штета.
На ред доаѓаат отпуштањата. Бројката од „само“ 16-процентната стапка на невработеност многу брзо може да се удвои. Затоа, предлагаат дел од бизнисмените, треба да се намалат платите на огромната државна администрација за 50 отсто и тие пари да бидат употребени како субвенција за платите на работниците од стопанството кои веќе ги разгледуваат можностите за префрлање во Заводот за вработување и бенефициите што од таму се нудат. Конечно стопанството е тоа кое го полни буџетот за платите на оваа бројна администрација.
За да не дојде до тоа, за не дојде до ново оптоварување на Буџетот што брзо може да резултира и со крах, треба сериозно да се разгледа овој предлог пред сите да паднеме во истата каша, предупредуваат бизнисмените.
Примерите во регионот се навистина сериозни - во Грција државата нуди гарантирана плата од 800 евра за сите вработени од компаниите кои се пред затворање поради кризата предизвикана од коронавирусот. Во Хрватска државата гарантира минимална плата за сите вработени во фирмите кои трпат големи штети од пандемијата. Во Чешка државата ќе покрие дури 80 отсто од платите на работниците чии компании се пред затворање...
На потег е македонската Влада...
