Дополнително, зголемени се казните, а на насилниците ќе им се забрани да чуваат и да набавуваат домашни миленици
Пратениците во четвртокот го изгласаа конечниот предлог за измени на Кривичниот законик со кои меѓу другото се воведува ново кривично дело – напуштање животни. Тој што ќе напушти домашно животно, домашно милениче, одгледувано диво животно и друго животно што треба да се чува под надзор, ќе се казни со затвор до една година.
Доколку, пак, дошло до смрт на животно поради напуштање или биле напуштени поголем број животни, сторителот ќе се казни со затвор до две години. Тоа е историска одлука за животните и резултат на големата вклученост на здружението „Пријатели на животните“, кое во 2021 година започна петиција со барање чинот на напуштање на животните да се третира со затворска казна.
Здружението слави и затоа што Министерството за правда и администрација покажа дека е во чекор со заштитата на животните во другите европски закони. Имено, го прифати нивниот предлог и во Кривичниот законик воведе нова безбедносна мерка – мерка забрана за чување и стекнување животни во период од една од пет години. Судот може да му изрече на лицето кое сторило кривично дело врз животно доколку постои опасност да стори исто или слично дело.
- Вклучувањето на оваа мерка е од исклучителна важност бидејќи многупати сме сведоци дека злоставувачите по извршувањето на најтешките кривични дела врз животните набрзо се стекнуваат со ново животно, кое исто така го злоупотребуваат и со тоа остануваат постојан социјален проблем и закана - појаснуваат „Пријатели на животните“.
Дополнителна причина за славење е зголемувањето на казните за нанесување непотребна болка на животните или нивно изложување на непотребно страдање, како и за убивање и жестоко малтретирање животни - претходно максималната казна можеше да биде и до една година затвор, но сега тоа ќе биде до две години. Доколку овие кривични дела се сторени од личен интерес, сторителот наместо досегашните две ќе може да добие затворска казна до три години.
- Им благодариме на граѓаните кои ја потпишаа петицијата, на надлежното министерство што ги прифати нашите предлози, на Владата што ги подобри постоечките одредби и на пратениците кои го поддржаа пропишувањето на напуштањето на животните како кривично дело и зголемувањето на затворските казни за кривичното дело мачење и убивање животни. Напуштањето на животните е навистина монструозен чин! Оној што ќе го напушти е свесен дека животното не може да преживее сам, дека може да биде убиено во сообраќај и дека смртта од глад, жед или смрзнување не доаѓа веднаш, туку вклучува долгорочно страдање и агонија - велат од „Пријатели на животните“.
Очекуваат дека овие законски измени ќе овозможат полесна имплементација и поефикасна заштита на животните во Хрватска. Тие ги повикуваат граѓаните да продолжат да пријавуваат секое напуштање и злоупотреба на животни за да стапат на дело измените во Кривичниот законик.
