Изминативе неколку месеци, цените на многу услуги забележаа драстични зголемувања, а меѓу нив се и услугите на плочкарите.
Доколку порано лепењето плочки чинеше меѓу 8 и 10 евра за квадратен метар, сега мајсторите ја зголемија оваа цена на дури 15 евра по квадрат.
Ова предизвика револт кај граѓаните кои планираат реновирања или новоградби, а истовремено ја зголеми тензијата меѓу мајсторите и нивните клиенти.
Плочкарот Сашо Валканов од Скопје, кој има долгогодишно искуство во занаетот, ги објаснува причините за ваквата одлука.
Тој вели дека зголемувањето на цените не е само каприц на мајсторите, туку резултат на општото покачување на цените во сите сектори.
„Сѐ е поскапено, и материјалите и горивото, но и другите услуги. Ако не ги прилагодиме цените, не можеме да ги покриеме нашите трошоци. Не сме само ние, сите услуги се поскапени. Затоа и решивме да ја зголемиме цената,“ изјави Валканов.
Граѓаните, пак, сметаат дека ова зголемување е нереално и дека ги става во незавидна ситуација.
Мирко Дојчиновски од Ѓорче Петров се соочува со проблем при наоѓање плочкар кој би работел по пониска цена.
„Имам околу 70 квадрати кои сакам да ги залепам со плочки, но не можам да најдам плочкар кој не се преценува. Сите бараат 15 евра за квадрат и не сакаат ни да чујат за помалку. Јас мислам дека тоа е премногу ако се земе предвид цената на плочките, на лепакот, на фугата,“ вели Дојчиновски, истакнувајќи дека трошоците за целото реновирање драстично се зголемуваат.
Плочкарите, сепак, инсистираат дека сегашната цена е реална според условите на пазарот и дека понатамошно намалување на трошоците е невозможно без компромис на квалитетот.
Ситуацијата со зголемувањето на цените ја отсликува широката економска криза која го зафаќа секојдневието на сите, без исклучок.
Останува да се види дали оваа ситуација ќе доведе до некакви промени на пазарот на трудот или ќе се бараат алтернативни решенија како намалување на квалитетот или одложување на реновирањата.
