Македонија се соочува со растечка инфлација, што значително влијае на животниот стандард на просечниот граѓанин. Според последните статистички податоци, инфлацијата достигна историски високи нивоа, принудувајќи многу семејства да ги прераспределат своите финансии и да се прилагодат на новите економски услови.
Економските аналитичари велат дека инфлацијата не е само статистички податок, туку дека таа директно влијае на куповната моќ на граѓаните.
„Со секојдневното зголемување на цените на основните производи, просечниот Македонец е принуден да се одрече од некои од своите потреби или да бара алтернативи кои се поевтини, но не секогаш соодветни“, коментираат експертите.
Тие додаваат дека особено се влошува ситуацијата за оние луѓе со фиксни приходи, кои не можат да ги приспособат своите приходи со растечките цени. Љубица Маџовска, социолог од Скопје, истакнува дека растот на инфлацијата создава стрес и несигурност во семејствата.
„Тековната ситуација создава општествена тензија. Граѓаните се загрижени за својата иднина и за иднината на своите деца. Тоа влијае на семејните односи, бидејќи стресот од финансиските проблеми често доведува до конфликти“, вели Маџовска.
Според неа, инфлацијата ја намалува и желбата за инвестирање во образованието и развојот, бидејќи семејствата се концентрирани на задоволување на основните потреби.
Многу семејства се принудени да ја променат својата потрошувачка навика, забележуваат економистите.
„Граѓаните почнаа да купуваат помалку и да бараат попристапни алтернативи на производите. Претходно, луѓето често купуваа органска храна и производи со повисока цена. Сега, многумина преферираат да купат поевтини варијанти, што може да влијае на квалитетот на исхраната“, велат експертите.
И покрај напорите на државата да се справи со инфлацијата, многу граѓани не чувствуваат значителна промена.
Извор: denar.mk
