Постојат моменти кога работодавачите сакаат да си дадете отказ - Ова се најчестите начини како ќе ги наведат вработените сами да си заминат.
Постојат повеќе причини зошто работодавачот сака да го принуди вработениот на отказ.
Во современиот свет, многу работодавачи се свесни дека за поуспешно работење е неопходно да привлечат и да се опкружат со добри вработени, но исто така е факт дека понекогаш работодавачите посакуваат некои вработени да дадат отказ – и тоа не само тие што не ги исполнуваат очекувањата и кои инаку би добиле отказ.
Исто така, наместо само да сакаат и да се надеваат дека квалитетните вработени самостојно ќе ја напуштат компанијата, некои работодавачи создаваат услови (совршено законски дозволени) поради кои добрите вработени посакуваат да заминат.
Постојат многу причини зошто работодавачот сака да го принуди вработениот на отказ. Една од причините е кога раководството на компанијата ќе одлучи дека оперативните трошоци се превисоки за нови вработувања или дека производната линија повеќе не е популарна и не знаат каде да ги преместат досегашните вработени. Или можеби вештачката интелигенција ја намалува потребата за вработени.
Без разлика на причината, вработените кои даваат отказ можат да ѝ заштедат на компанијата време и пари бидејќи нема да има потреба да им исплатуваат отпремнина, да плаќаат придонеси и финансиска помош додека бараат работа.
Еден од начините како да се натера вработениот самостојно да даде отказ е да се принуди да доаѓа на работа секој ден, односно да му се укине хибридниот начин на работа од дома.
Друг начин е малтретирање на вработениот во толкава мера што ќе биде исклучен од сите клучни проекти и ќе му се сведат работните обврски на минимум. Потоа тука е и микроменаџирањето, што често доведува до тоа вработените самостојно да заминат наместо да им пишува во работната книшка дека добиле отказ.
Но, сето ова е само една страна на медалот. Имено, според некои експерти, први кои нема да се согласат со секојдневното доаѓање на работа се најдобрите вработени, бидејќи тие знаат дека имаат избор и лесно ќе најдат нова работа.
Исто така, ако работодавачите започнат со мерки осмислени за да натераат некој да даде отказ, може да се случи во целокупното работно опкружување да се создаде доста негативна атмосфера.
И иако сето ова звучи понижувачки и неправедно, сите овие стратегии за „протерување“ некого од компанијата се законски дозволени ако сте се вработиле во компанијата по сопствена волја. Единственото што можете да направите како вработен во такви случаи е да не дадете отказ, бидејќи тоа е она што вашиот работодавач го посакува, и да работите уште повеќе, со цел јасно да му ставите до знаење дека сте квалитетен работник и дека ќе направи грешка ако ве отпушти.
И уште една работа околу која се согласуваат експертите е дека дури и ако одлучите да го промените работното опкружување, никогаш не зборувајте лошо или не трачарете за претходните работодавачи на социјалните мрежи, бидејќи секој иден работодавач ќе ги провери вашите профили на социјалните мрежи за да ја провери вашата работна историја.
