Во периодов кога сите се „заглавени“ дома, слободно можеме да кажеме дека се создаваат некои услови за заштеда. И да посакаме, нема каде да потрошиме пари: има ограничено движење, а рестораните, клубовите, спортските сали и трговските центри не работат.
Речиси и да нема неочекувани трошоци, а парите што ги трошиме секојдневно се во најголем дел за производи за храна и хигиена.
Пресметката подоле е направена според груби бројки и не ја претставува фиксната месечна потрошувачка. Истата варира во зависност од стилот на живот на индивидуата.
Бензин 3000 денари
Бензин се става еднаш неделно, а понекогаш и два пати, во зависност од тоа колку многу го користиме автомобилот. Во овој период не се трошат пари за паркинг, па додадете уште неколку стотина денари на вкупниот износ. Кога се тоа ќе се собере и ќе се додаде периодот на изолација, калкулаторот покажува дека во нормални околности околу 3000 денари месечно ни се „резервирани“ за бензин.
Цигари 1000 денари
Доколку сте пушач, ова веројатно е најдобар период да се откажете од цигарите. Да претпоставиме дека пушите по една кутија на два дена. На месечно ниво тоа би биле околу 15 кутии. Доколку земеме дека просечната цена на една кутија е 60-65 денари, тоа би било околу 900-1000 денари на месечно ниво.
Храна за на работа 2000 денари
Доколку не носите храна од дома, тогаш купувате храна за време на пауза. Можеби не сте направиле пресметка, но кога би ги собрале бројките, вкупната сума би ве изненадила. Во еден месец имаме 20 работни денови. Доколку на дневно ниво трошите по 100 денари за јадење, тоа вие се 2000 денари месечно. Многу, нели?
Теретана 1500 денари
Цените на теретаните варираат, но просечната месечна членарина се движи од 1200 до 2500 денари. Теретаната периодов е заменета со вежбање по дома, а со тоа доаѓа и заштедата.
Ресторан/кафе 2000 денари
Одењето на кафе или во ресторан со пријателите е редовна „активност“ на повеќето. Да речеме дека барем два пати неделно пиете кафе со вашите најблиски. Тоа е 8 пати месечно по 80 денари, односно 640 денари пресметано во бројки. Средната цена на едно седнување во ресторан за двајца е околу 1000-1200 денари (оваа бројка повторно зависи од местото на седнување, како и големината на нарачката). Тешко е за оваа категорија да се даде дури и приближна бројка, но како и да ја направите пресметката, цифрата секогаш изнесува минимум 2000 денари.
Дополнителни трошоци
Во овој дел се наоѓаат останатите трошоци кои варираат според интересот на индивидуата: одење на фризер, козметичар, кино/театар, планинарење, концерт...
