Спар, Хофер и Лидл не сакаат да се откажат од непрехранбениот сектор, кој има значителен удел во нивниот бизнис, како дел од владината борба против пандемијата
Трите најголеми трговски ланци во Австрија - „Спар“, „Хофер“ и „Лидл“ не се согласуваат со некои од мерките против пандемијата што влијаат на тој сектор. Во обид да се запре ширењето на инфекцијата, Австрија минатата недела воведе ригорозни правила кои ќе останат на сила до 7 декември.
Според новите правила супермаркети, аптеки, пошти, банки, автомобилски услуги и продавници за велосипеди, медицинска опрема и храна за животни, како и бензински пумпи се едни од ретките продажни места на кои им е дозволено да останат отворени, бидејќи се сметаат за неопходни.
Сепак, ни малопродажните ланци не беа поштедени од одредени ограничувања, па им беше наредено да го стеснат асортиманот. На таквата одлука најмногу влијаеше претходната жалба на трговците на мало кои беа принудени да ги затворат продавниците затоа што не беа „неопходни“. Тие сметаа дека големите трговци се неправедно привилегирани затоа што можат да продаваат многу производи за кои владата смета дека не се „неопходни“. Владата не дефинираше што можат и што не можат да продаваат супермаркетите, освен дека е наведено дека асортиманот треба да биде ограничен на „типични производи за малопродажба“, објави „Кронен цајтунг“.
Сепак, австрискиот печат објави дека големите трговци кои заземаат најзначаен удел на пазарот - „Спар“, „Хофер“ и „Лидл“ не сакаат да ги затворат своите сектори со непрехранбени производи кои имаат значителен удел во нивната деловна активност.
Како што објави австрискиот „Курир“, тие не сакаат да ја следат одредбата, а во заедничката изјава наведоа дека „ограничувањата се спротивни на законот и уставот“. Тие посочија дека законски ги провериле своите ставови и додадоа дека Министерството за здравство може да нареди затворање на продавници, во согласност со австрискиот закон за акција за време на пандемија, но дека не може да наметнува ограничувања за снабдување со отворени продавници.
Од друга страна, „Била“, која е во сопственост на „Реве група“ и која има релативно низок удел на непрехранбена програма во однос на конкуренцијата, објави дека ќе ги почитува државните мерки во борбата против ковид 19 и на клиентите ќе им нуди само производи карактеристични за трговија со храна. Тие ги поканија другите трговци со намирници да го следат тој пат. Од асортиманот отстранија играчки, техничка стока и низа производи за домаќинството. И многу други австриски супермаркети сега веќе не продаваат електронски уреди, цвеќиња, градинарски алат, свеќи ... Всушност, се посочува, факт е дека ако одлучат да продадат која било од овие предмети, продавниците ризикуваат да платат казна од 3.600 евра.
