На врвот на листата се наоѓаат земјите од Балканот, каде што работната недела е значително подолга, додека во западниот и северниот дел на Европа работниците поминуваат помалку време на работното место.
Балканот со најдолга работна недела
Доколку се вклучат и земјите кандидати за членство во ЕУ, најдолго работат граѓаните на Турција, со просек од 42,4 часа неделно. По неа следуваат Босна и Херцеговина со 40,9 часа и Србија со 40,6 часа неделно.
Високо на листата се наоѓаат и Грција со 39,6 часа и Македонија со 39,5 часа неделно, што ја вбројува земјата меѓу државите со најдолго просечно работно време во Европа.
Експертите посочуваат дека ова не е резултат на личен избор на работниците.
„Во ниту една земја работниците сами не одлучуваат колку часови ќе работат. Подолгото работно време на Балканот често е последица на пониска продуктивност и послаба преговарачка позиција на вработените во однос на работодавачите“, објаснува професорот Дејвид Спенсер од Универзитетот во Лидс.
Холандија со работен ден пократок од седум часа
На спротивниот крај од листата се наоѓа Холандија, каде што просечната работна недела трае само 31,9 часа. Тоа значи дека просечниот работен ден е пократок од седум часа.
Сличен модел имаат и Германија, Норвешка и Данска, каде што просекот изнесува 33,9 работни часа неделно.
Една од причините за ваквите резултати е фактот што дури 43 проценти од вработените во Холандија работат со скратено работно време, што е највисок удел во Европа. Дополнително, силните колективни договори обезбедуваат подобра рамнотежа меѓу работата и приватниот живот.
Германија работи помалку од останатите големи европски економии
Споредбата меѓу четирите најголеми економии во Европа покажува интересни разлики. Германија има најкратка работна недела со 33,9 часа, што е речиси два часа помалку во споредба со Франција (35,6 часа), Италија (36,1 час) и Шпанија (36,3 часа).
Аналитичарите сметаат дека пократкото работно време во Германија е резултат на долгогодишното влијание на синдикатите и колективното договарање, кои придонесуваат за помал број прекувремени часови и поголемо почитување на работничките права.
Во кои професии се работи најмногу?
Податоците на Евростат покажуваат дека разликите не постојат само меѓу државите, туку и меѓу различните сектори.
Најдолго работно време имаат вработените во земјоделството, шумарството и рибарството, со просек од 42 часа неделно. Веднаш по нив се менаџерите и директорите, кои во просек работат 40,6 часа неделно.
Од друга страна, најкратка работна недела имаат административните и помошните услужни дејности, со просек од 31,8 часа, како и вработените во продажниот сектор.
Заклучокот од анализата е јасен: поразвиените економии, благодарение на повисоката продуктивност, технологијата и подобрата организација на работата, успеваат да создадат поголема вредност со помалку работни часови. Во помалку развиените економии, недостатокот на такви услови сè уште се надоместува со подолго време поминато на работа.