Скопје конечно добива три современи јавни тоалети на најкритичните локации во центарот

Надлежните најавија дека подготовките на терен се веќе во тек и дека во претстојниот период Скопје ќе добие три современи јавни тоалети. Овие нови санитарни објекти е предвидено да бидат поставени на три исклучително фреквентни и клучни точки низ градот, кои секојдневно бележат огромна циркулација на локално население, но и на странски туристи.

Според изготвениот план за микролокации, првиот јавен тоалет ќе биде позициониран во рамките на Градскиот парк, простор кој е особено посетен во текот на целата година. Вториот објект е предвиден за реонот околу плоштадот Филип Втори на влезот кон Старата скопска чаршија, додека третиот ќе се наоѓа во непосредна близина на главниот градски плоштад Македонија.

Со ваквиот распоред се очекува делумно да се покрие најкритичната зона каде што со децении отсуствуваше ваква основна инфраструктура.

Акутниот недостиг на јавни санитарни јазли со години се провлекуваше како една од најчестите забелешки не само од жителите на Скопје, туку и од туристичките работници. Водичите постојано алармираа дека се соочуваат со сериозни непријатности при организираните разгледи и дека често се принудени да ги молат локалните угостители за користење на нивните капацитети.

Граѓаните будно го следат почетокот на проектот и покрај брзата изведба, нагласуваат дека од клучно значење ќе биде воспоставувањето на одржлив систем за хигиена, при што дел од јавноста предлага и воведување на симболична наплата со цел објектите да останат чисти, функционални и заштитени од вандализам.

извор:skopjeinfo.mk