Според очевидецот Владимир Авдонин, лав-рибата била забележана и фатена во градот Добра Вода, недалеку од плажата Ројал Вилас Бич Клуб, локација каде што голем број туристи престојуваат во текот на сезоната. Како што рече Авдонин, рибата била фатена на длабочина од околу осум метри, само десет метри од брегот.
– Со оглед на тоа што ова е мое второ набљудување на овој вид за краток временски период, сметав дека е важно да ја информирам јавноста – рече тој, а пренесоа црногорските медиуми.
Новото појавување на овој вид за кратко време дополнително ги потврдува проценките на експертите дека лав-рибата успешно се прилагодува на условите во Јадранското Море и постепено се шири по должината на брегот.
Нејзината најголема опасност лежи во нејзините отровни боцки. Убодот може да предизвика исклучително силна болка, оток, црвенило и сериозни здравствени проблеми. Во некои случаи, може да се појават гадење, повраќање, вртоглавица, несвестица, па дури и привремени невролошки проблеми.
Зошто е опасна лав-рибата?
Рибата лав, позната и како lionfish, се смета за еден од најинвазивните морски видови во светот. Таа е родена во топлите води на Индискиот и Тихиот Океан, но во последниве години се повеќе се појавува во Медитеранот поради зголемувањето на температурата на морето.
Што да се прави во случај на убод?
Експертите наведуваат дека отровот на лав рибата е чувствителна на високи температури. Во случај на убод, препорачливо е повредениот дел од телото да се потопи во многу топла вода, приближно 45 степени, 30 до 60 минути, по што е потребно да се побара медицинска помош.
Покрај тоа што претставува потенцијална опасност за луѓето, рибата лав го загрозува и морскиот екосистем. Поради својата агресивна исхрана и недостатокот на природни непријатели, може значително да влијае на бројот на автохтони видови риби.
Затоа, експертите ги повикуваат граѓаните, нуркачите и рибарите да пријават какви било нови забележувања на овој вид до надлежните институции со цел да се следи неговото понатамошно ширење во Јадранското Море.