Дојран повторно станува едно од најпопуларните места за летување во Македонија, особено меѓу оние што бараат мир, езерска атмосфера и поволни цени. Социјалните мрежи и туристичките групи последниве недели се преплавени со коментари и искуства од посетители кои го фалат Дојран како најдостапна летна алтернатива. Според нив, цените на сместувањето се движат од 600 до 800 денари по човек, што е речиси невозможно да се најде на други дестинации во регионот.
Апартмани за тројца може да се изнајмат за 1.500 до 2800 денари вкупно, додека класичните соби за едно лице се движат од 800 до 1.300 денари по ноќевање. Посетителите кои споделија свои искуства велат дека за тие пари добиле уреден апартман со клима, интернет, паркинг и локација блиску до езерото. Најчестата пофалба е токму вредноста за парите – чисти услови, пријатни домаќини и топла вода во езерото, што сè уште го прави Дојран уникатна дестинација.
На социјалните мрежи веќе вријат искуства од задоволни гости. „Плативме 1.800 денари за тројца во апартман со клима и Wi-Fi, блиску до езеро. Одлична вредност,“ пишува еден посетител. Други пак потврдуваат дека цените сезонава се „поволни, реални и конечно пристапни за секого.“
Но, не сè е совршено. Во истиот простор на социјалните мрежи може да се сретнат и поплаки. Некои посетители велат дека плаќале висока цена за скромна соба, без клима, со стар мебел или дури и со проблеми со хигиената. Има и забелешки за тоа дека не се издава фискална сметка или дека се наплаќа дополнително за работи што не биле најавени при резервација, како што се паркинг или Wi-Fi. Дел од корисниците истакнуваат дека во некои случаи, цената повеќе наликувала на онаа во Грција, но без истиот квалитет.
И покрај тоа, за многу луѓе оваа година Дојран останува логичен избор. Со економската реалност и високите цени во странство, се повеќе семејства, парови и млади луѓе се одлучуваат за домашна дестинација. Дојран им нуди нешто што ретко се наоѓа денес – одмор кој не го уништува буџетот. Иако сместувачките капацитети се со различен квалитет, ако се резервира навреме или со препорака, може да се добие сосема солиден аранжман за цена која е навистина фер.
На крајот, искуството во Дојран зависи од очекувањата. За некого тоа е евтин и мирен бег од секојдневието, за друг – скромен компромис. Но за многумина, оваа сезона токму Дојран е одговорот на прашањето каде на одмор, без да се направи финансиска гимнастика.