Кај останатите мерки, не само што стимулациите од државата се помали на годишно ниво, туку и останале високи суми како планирани а неисплатени во 2025. Така, кај потпрограмата за грантови за млади земјоделци до 10.000 евра, набавка на трактори, набавка на приклучна механизација и останато, што влегува во секторот за поддршка на руралниот развој, во 2025 биле планирани 6,05 милиони евра, но потрошени само околу 3,20 милиони евра. За споредба, во 2024 биле исплатени околу 7,18 милиони евра за овие стимулации.
Катастрофално поминал и „Интервентниот фонд“ со кој најчесто со дополнителни средства по килограм се стимулира производството на култури каде што има пазарни нарушувања. Од околу планирани 3,9 милиони евра, префрлени на сметките биле само околу 1,46 милиони евра. За споредба, во 2024 биле исплатени 6,12 милиони евра од „Интервентниот фонд“.
Министерството за земјоделство најавуваше законски измени со што беа предвидени нови стимулативни мерки кај каматните стапки и грантови до 100.000 евра за млади брачни парови доколку се вратат на село и работат земјоделие, иако под одреднеи услови и ризици. Измените на Законот за земјоделство и рурален развој не се финално изгласани и стапени во сила.
Агенцијата за финансиска поддршка врши и исплата на ИПАРД средства. Министерот за земјоделство Цветан Трипуновски вчера информираше дека контролите од страна на Европската комисија се завршени и дека ИПАРД-от е повторно достапен за земјоделците. Опозицијата претходно реагираше дека грантовите се стопирани со апсењето на тогашниот директор на Платежната агенција, Илија Стоилев.
Извор:faktor.mk