Во четвртокот од таа последна недела на Христовиот живот на земјата беше востановена животоносната тајна на Црквата тајната на Евхаристијата. Таа тајна е востановена во горната соба од една ерусалимска куќа, кога Христос зеде леб, го прекрши и им подаде на учениците, т.е. на апостолите, а зеде и чаша со вино и исто така им ја подаде да пијат, со што ја најави својата смрт и таинствениот трепет што треба да го имаат учениците, зашто по неговата смрт беше јасно дека нешто ќе се случи. Таа тајна е изворот на целокупното богослужење на Црквата, а нејзиниот централен дел е причестувањето со телото и крвта Христова.
Главен обичај што се изведува на Велики Четврток и со посебно внимание е вапсувањето на велигденските јајца.
На Велики Четврток според православната традиција се бојадисуваат велигденските јајца – еден од најубавите и најзначајни обичаи за Велигден. Првото јајце секогаш е црвено. Се вика „чуваркуќа“ и се чува во домот до следниот Велигден како симбол на здравје, заштита и благослов.
Јајцето го претставува новиот живот, а црвената боја ја симболизира Христовата крв и Воскресението. Обично се бојадисуваат рано наутро, а во традицијата учествува целото семејство, што го прави овој ден посебно топол и радосен.