„Џапан ерлајнс“ планира да воведе хуманоидни роботи во пробна работа од почетокот на мај, со цел нивна долгорочна примена како решение за хроничниот недостиг на работна сила, пишува „Гардијан“.
Кинеските роботи ќе го преместуваат багажот и товарот на пистата на аеродромот Ханеда, кој годишно опслужува повеќе од 60 милиони патници. Проектот се спроведува во соработка со „Глома интернет груп“, а тест-фазата ќе трае до 2028 година.
Целта е да се намали работното оптоварување на вработените во услови на силен раст на влезниот туризам и сè поизразен недостиг на работна сила. Во неодамнешна демонстрација за медиумите, роботот висок 130 сантиметри, произведен од „Унитри“, внимателно го префрли товарот на транспортерска лента до авионот и го поздрави колегата додека го правеше тоа.
Претседателот на „ЈАЛ граунд сервис“, Јошитеру Сузуки, изјави дека роботите на физички тешки работни места „неизбежно ќе го намалат обемот на работа на работниците и ќе донесат значителни придобивки за вработените“.
Јапонија се соочува со истовремено зголемување на бројот на странски туристи и стареење и намалување на домашното население. Според Јапонската национална туристичка организација, повеќе од седум милиони луѓе ја посетиле земјата во првите два месеци од 2026 година, што е намалување од рекордни 42,7 милиони минатата година.
Проценките покажуваат дека на Јапонија ќе ѝ бидат потребни повеќе од 6,5 милиони странски работници до 2040 година за да го одржи економскиот раст, бидејќи домашната работна сила продолжува да се намалува. Иако бројот на странци во земјата расте, властите се под зголемен политички притисок да ја ограничат имиграцијата.
Претседателот на „ГМО АИ“ и роботика, Томохиро Учида, предупреди дека аеродромите, и покрај високото ниво на автоматизација, сè уште се потпираат на човечки труд и се соочуваат со сериозен недостиг на работна сила.
Роботите можат да работат континуирано два до три часа, а постојат планови да се користат и за други задачи, како што е чистење на кабини на авиони.
Извор:slobodenpecat.mk