Во оваа статија ќе ги најдеш најважните совети и чекори за успешно барање работа во Германија без разлика дали си со почетно ниво на јазик, бараш едноставна работа или си образуван професионалец и имаш високо ниво на познавање на германскиот.
Како да започнеш со барање работа?
Пред да почнеш да испраќаш апликации и да бараш огласи, постави си неколку суштински прашања. Тие ќе ти помогнат да се фокусираш, да заштедиш време и да се прилагодиш на реалноста на германскиот пазар на труд.
Прво прашање: Каква работа бараш?
• Целосно работно време (Vollzeit)
• Скратено работно време (Teilzeit)
• Мини-работа до 538 € месечно (Minijob)
Второ прашање: Работа по струка или било каква работа за почеток?
• Ако бараш работа по струка, можеби ќе ти треба признавање на дипломата и повисоко ниво на германски.
• Ако си отворен/а за различни опции, можеш да започнеш со едноставни работи – на пример во гастрономија, магацини, чистење, достава итн.
Трето прашање: Кои квалификации се потребни?
- Јазично ниво
- Дипломи или стручна обука
- Други вештини: комуникација, физичка спремност, возачка дозвола
1. Подготви добар Lebenslauf (CV)
CV-то односно кратката биографија треба да биде кратко, јасно и уредно. Се пишува во табеларна форма, без долги параграфи.
Вклучи:
- Име, адреса, контакт
- Фотографија (професионална)
- Работно искуство (од најново кон најстаро)
- Образование
- Јазични и компјутерски вештини
- Хоби или волонтерски активности (опционално)
Тука: https://lebenslauf.com ќе најдете различни формати на CV. Може да го одберете оној што најмногу ви одговара и да го пополните со вашите лични податоци.
Дури и ако немаш многу искуство, наведи семејна работа, грижа за деца, волонтирање – сè што покажува дека си одговорен/а.
2. Напиши мотивациско писмо (Anschreiben)
Мотивациското писмо е твоја лична презентација. За секоја апликација се пишува ново писмо.
Одговори на:
- Зошто аплицираш кај нив?
- Кои се твоите вештини?
- Зошто си добар/а кандидат/ка?
Тука: https://bewerbung.net/bewerbungsschreiben ќе најдете различни формати за мотивационо писмо. Може да го одберете оној што најмногу ви одговара и да го пополните со вашите лични податоци.
Важно е да е јасно, искрено и граматички коректно.
3. Каде да бараш работа?
Интернет:
- www.arbeitsagentur.de (државна агенција)
- www.stepstone.de
- www.indeed.de
- www.monster.de
- www.kleinanzeigen.de (неформални работи)
Лично:
- Прашај во продавници, ресторани, хотели
- Достави CV лично – остава добар впечаток
Преку контакти:
- Пријатели, роднини, познаници
4. Каква работа можеш да најдеш според јазичното ниво?
Ако си A1–A2:
- Магацин
- Кујна, перење садови
- Чистење
- Достава
- Помошни работи во фабрики
Ако си B1–B2:
- Продавници
- Хотели
- Грижа за стари лица
- Канцелариска работа
За струка:
- Јазично ниво од Б1 – Ц1 (зависно од струката)
- Потребно е признавање диплома (Anerkennung)
- Провери кај Anerkennungsberatung во твојот град
5. Подгответе се за интервју (Vorstellungsgespräch)
Типични прашања:
- „Erzählen Sie etwas über sich.“
- „Was sind Ihre Stärken und Schwächen?“
- „Warum möchten Sie bei uns arbeiten?“
Вежбај со пријател, наставник или пред огледало. Подготви кратки и јасни одговори.
6. Потпиши договор само ако разбираш што потпишуваш
Провери:
- Колку часа неделно?
- Колкава е платата бруто и нето?
- Колку дена одмор?
- Има ли пробен рок?
Ако нешто не ти е јасно, побарај помош. Не потпишувај на слепо.
7. Побарај поддршка – не си сам/а!
Следниве институции нудат бесплатна помош:
- Jobcenter / Agentur für Arbeit – поддршка при барање работа и обука
- Мигрантски центри (Caritas, AWO, DRK, Diakonie) – помош со документи и совети
- Јазични школи – често нудат Bewerbungstraining (тренинг за аплицирање)
8. Биди трпелив/а – процесот бара време
Понекогаш ќе треба да испратиш многу апликации пред да добиеш позитивен одговор, тоа е нормално.
• Аплицирај редовно
• Прилагодувај го мотивациското писмо
• Не се откажувај после првите „не“ – учиш со секој чекор
Заклучок
Барањето работа во Германија не е секогаш лесно, но е остварливо. Со добар CV, подготвеност, трпение и поддршка, можеш да го најдеш своето место. Дури и ако започнеш со едноставна работа, тоа е чекор напред.
Биди активен/а, отворен/а и упорен/на. А германскиот јазик? Со постојана работа, континуирано учење и посветеност, успехот е неизбежен.
Автор на статијата: Наталија Кирковска