Клучниот ризик, како што се посочува, е можноста за ограничување или прекин на транспортот низ Ормутскиот теснец – една од најважните рути за снабдување со енергенси. Таков развој би имал директно влијание врз достапноста и цената на авионското гориво, што е еден од најголемите трошоци во работењето на авиокомпаниите.
Иако во моментов во Европа се забележуваат одредени корекции во летачките распореди, станува збор претежно за одложување или откажување на планирани проширувања на линии, а не за укинување на редовните летови. Сепак, неизвесноста на пазарот веќе ги принудува компаниите да преземаат мерки за прилагодување.
Најголем удар трпат помалите авиопревозници, кои располагаат со ограничени ресурси и потешко се справуваат со растечките трошоци. Во исто време, профитните маргини во индустријата, кои вообичаено се релативно ниски, дополнително се намалуваат и во некои случаи се доближуваат до нулата.
Големите авиокомпании, пак, веќе започнаа со рационализација на трошоците, вклучително и ревизија на рутите и оптимизација на флотите. Дел од стратегиите вклучуваат користење на помали и поекономични авиони, со цел да се намали потрошувачката на гориво.
Во меѓувреме, производителите на авиони бележат промени во побарувачката, при што интересот за одредени типови летала се зголемува, како резултат на потребата за поефикасни и поекономични решенија во услови на нестабилен пазар.
Извор:biznisvesti.mk