Октоберфест 2026 се одржува од 19 септември до 4 октомври на познатата Терезиенвизе во Минхен. За време на фестивалот се ангажираат илјадници сезонски работници – од келнери и готвачи до обезбедување, продавачи и помошен персонал.
Но токму работата во пивските шатори привлекува најголемо внимание поради можноста за висока заработка за релативно краток период.
Над 5.000 евра за целиот фестивал
Според информациите објавени од Минхен за работата на Октоберфест, келнерите можат да заработат повеќе од 5.000 евра во текот на целиот ангажман.
Сепак, ова не треба да се сфати како загарантирана фиксна плата што ја добива секој келнер.
За разлика од класично работно место со однапред утврдена месечна плата, заработката на Октоберфест во голема мера зависи од прометот, шаторот, делот во кој работи келнерот и бројот на гости што ги услужува.
Најдобро се заработува во ВИП-ложите
Не сите маси на Октоберфест носат иста заработка.
Особено атрактивни се местата во ложите, каде гостите покрај пиво нарачуваат и поскапи пијалаци, вклучувајќи вино и шампањ, како и храна. Поголемата сметка значи и поголем потенцијал за заработка.
А тука е и бакшишот.
Во текот на најпрометните денови, кога низ шаторите минуваат огромен број посетители, бакшишот може значително да го зголеми конечниот приход на келнерите.
Голема заработка, но и исклучително напорна работа
Сумата звучи примамливо, но зад неа стојат долги и физички напорни работни денови.
Келнерите со часови се движат меѓу преполни маси, носат повеќе големи кригли пиво одеднаш, послужуваат храна и работат во бучна средина со илјадници гости.
Темпото е особено интензивно во вечерните часови и за време на викендите, кога шаторите се најпосетени.
Токму затоа искуството, физичката издржливост и способноста за брза работа со голем број гости се особено важни.
5.000 евра не се загарантирани за секого
Иако заработката може да изгледа како неколку месечни плати собрани во само 16 дена, конечната сума значително се разликува од човек до човек.
На неа влијаат бројот на одработени часови и денови, локацијата во шаторот, прометот, посетеноста и бакшишот.
Затоа бројката од над 5.000 евра треба да се гледа како можен/просечен приход за ангажманот, а не како фиксна плата што му следува на секој што ќе се вработи на фестивалот.