Во Италија, цената на скијачките билети за дестинации како што се Доломитите и Апенините ќе се зголеми за 40 проценти во споредба со 2021 година, што Националната агенција за заштита на потрошувачите го осуди како целосно неоправдано.
Студија спроведена претходно оваа година откри дека вкупните трошоци за скијање во Европа се зголемиле за 34,8 проценти од 2015 година.
Дали е сè уште можно да се скија во Европа со ограничен буџет? Одговорот е да, само треба да погледнете малку подалеку од класичните одморалишта во Италија и Швајцарија.
Бугарија често е на врвот на листите за најевтини скијачки одмори во Европа, делумно благодарение на достапните ски-карти, објавува Euronews.
Боровец се наоѓа високо во планините Рила, во југозападна Бугарија. Има 58 километри патеки, што е помалку од многу европски ски-центри, но неговата позиција значи дека има загарантиран снег речиси целата сезона.
Скијачкиот центар наплаќа околу 52 евра на ден, со попусти во текот на ноември и декември.
Сезонски скијачки билет за возрасни чини 1020 евра, но ако имате над 75 години, можете да ги користите скијачките патеки на Боровец цела сезона за само 54 евра.
Слично на тоа, Банско во Националниот парк Пирин им овозможува на туристите да потрошат околу една третина од она што би го потрошиле во некои швајцарски одморалишта.
До крајот на ноември, сезонски билет за возрасни чини 869 евра или 51 евро за лица над 75 години. Цената за остатокот од сезоната и еднодневните билети сè уште не е објавена, но минатата година дневен билет за возрасни чинеше околу 56 евра.
Сместувањето околу двата одморалишта е исто така поволно, со приватни изнајмувања кои почнуваат од 30 евра по ноќ, а хотели co четири ѕвезди од 50 евра.
Двeта одморалишта нудат автобус од аеродромот во Софија, што ги намалува трошоците.
Авантура во Грузија
Скијачките центри во Грузија се уште една добра опција, со дополнителна предност на многу снег. Грузиските падини имаат предност што се доста високи. Одморалиштата Гудаури и Тетнулди се протегаат од 2000 до над 3000 метри надморска височина.
Затоа е еден од најеколошките скијачки центри во Европа, бидејќи одморалиштата не мора да користат вештачки снег.
За Питер Мајер, водач на тимот во скијачкото училиште „Вагабонд Адвенчрс“ во Гудаури, Грузија нуди и допир на авантура што едноставно нема да го добиете во дотераните одморалишта и бајковитите села на Алпите.
Скијачките карти чинат околу 25 евра дневно, а најдобрата понуда е сезонска карта што ви овозможува неограничен пристап до сите скијачки центри во Грузија за околу 200 евра. Изнајмувањето чини просечно 22 евра за целосен сет опрема дневно.
Прифатливо скијање во Андора
Андора не е нова скијачка дестинација, но нејзините патеки во Пиринеите го задржале својот опуштен карактер, но исто така и нивните цени.
Скијачкиот центар Пал-Аринсал има 63 километри патеки достапни за околу 52 евра дневно. Почетниците и средните скијачи можат да најдат многу соодветни патеки. Понапредните можат да најдат патеки на надморска височина од над 2.500 метри.
Сезонскиот Норд Пас за 750 евра овозможува неограничен пристап до скијачкиот центар Пал Аринсал и Ордино Аркалис, вкупно 90 километри патеки.
За 970 евра, скијачите можат да го купат Андора Пас, кој ја вклучува и областа Грандвалира. Ова е најголемиот скијачки центар во Пиринеите, со 140 патеки од сите нивоа, долги 215 километри, кои достигнуваат до 2600 метри надморска височина.
Исто така, има и снежни паркови, патеки надвор од утабаните патеки и планинарски кругови. Дневна карта за возрасни чини околу 61 евро.
Грандвалира неколку пати ја освои наградата за најдобар скијачки центар во Андора на Светските скијачки награди, во 2023, 2022, 2020 и 2015 година.